თორნიკე შენგელიას კიდევ ერთი დასამახსოვრებელი მატჩი ევროლიგაში. საქართველოს ნაკრების კაპიტანი ბარსელონას საფრანგეთში მოგებული მატჩის ერთ-ერთი მთავარი მოქმედი ფიგურა გახლდათ. ბარსელონამ ვილერბანი 98:91 დაამარცხა, ქართველი ფორვარდი კი 22 ქულით გამოირჩა.
შენგელია კატალონიელთა სასტარტო ხუთეულში იყო და მოედანზე გატარებულ 22:47 წუთში 22 ქულა, 5 მოხსნა და 3 პასი მიითვალა. თორნიკემ მაღალი სიზუსტით ისროდა – 8-იდან 6 ორქულიანი ჩააგდო, რასაც ერთი ზუსტი სამქულიანი და 7-იდან 7 საჯარიმო დაუმატა. შენგელიაზე მეტი ქულა ბარსაში მხოლოდ კევინ პანტერს ჰქონდა – 31. ამერიკელ-სერბი ასევე ერთადერთი იყო, ვისაც ქართველი PIR-ით (სარგებლიანობის კოეფიციენტით) ჩამორჩა. პანტერს ეს მაჩვენებელი 34 ჰქონდა, შენგელიას – 28.
ბარსელონამ ევროლიგაში ზედიზედ მეორე თამაში მოიგო. ხავი პასკუალის გუნდს 16 მოგების წილ 8 მარცხი აქვს და სატურნირო ცხრილში მე-4 ადგილზეა. ლიგაში მომდევნო შეხვედრას კატალონიელები 29 იანვარს, სტუმრად პირეოსის ოლიმპიაკოსთან ჩაატარებენ.
