შერმადინის 13 ქულა, 10 მოხსნა და ტენერიფეს ბრძოლაში გამარჯვება მურსიასთან

ესპანეთის საკალათბურთო ლიგის მე-20 ტურში გიორგი შერმადინის „ტენერიფე“ „მურსიას“ შეხვდა და დაძაბულ ბრძოლაში, 75:73 გაიმარჯვა. წარმატებაში დიდი წვლილი შეიტანა ქართველმა ცენტრმა, რომელმაც ორმაგი დუბლი გაიფორმა.

შეხვედრის პირველი ტაიმი „ტენერიფემ“ 7-ქულიანი უპირატესობით მოიგო. მეორე ტაიმი უფრო აქტიურად „მურსიამ“ დაიწყო და ბოლო მეოთხედის წინ ერთი ქულით წინ გავიდა, თუმცა უკანასკნელ მეოთხედში მასპინძლებმა ტემპს მოუმატეს და შეხვედრა საბოლოო გამარჯვებამდე მიიყვანეს.

საქართველოს ეროვნული ნაკრების წევრმა, გიორგი შერმადინმა „ტენერიფეს“ რიგებში მოედანზე 26:46 წუთი გაატარა,  რა დროშიც 13 ქულა, 10 მოხსნა, 1 შედეგიანი გადაცემა და 1 ჩაჭრა დააგროვა. გიორგიმ თამაშიდან 10-ჯერ ისროლა, საიდანაც 5 სროლა ზუსტი იყო, მან ასევე 4 დან 3 საჯარიმო გამოიყენა.

 

„ტენერიფე“ ესპანეთის საკალათბურთო ლიგაში 11 გამარჯვებითა და 9 მარცხით მე-6 ადგილზეა. 21-ე ტურის მატჩს შერმადინის გუნდი 4 თებერვალს, შინ ბასკონიასთან გამართავს.