გიორგი შერმადინი ჩვეულ სტიქიაშია. ეს ნიშნავს, რომ მისმა გუნდმა ესპანეთის ჩემპიონატში იმარჯვა, ქართველი ცენტრი კი მოედანზე ყველაზე შედეგიანი და შესაბამისად, მატჩის MVP გახდა. ეს ამბავი ლიგა ენდესას მორიგ, 28-ე ტურში მოხდა, რომელშიც “ტენერიფემ” “ბრეგანს” უმასპინძლა და
96:78 დაამარცხა.
შერმადინი სასტარტო ხუთეულში იყო და მოედანზე გატარებულ 26:18 წუთში 19 ქულა, 5 მოხსნა და 3 პასნი მოაგროვა. გიორგიმ 9-დან 6 ორქულიანი და 7-დან 7 საჯარიმო ჩააგდო, ხოლო მისი მარგი ქმედების კოეფიციენტი 32-ს გაუტოლდა, რაც ორივე გუნდის შემადგენლობაში საუკეთესო შედეგი გახლდათ. ცხადია, ქართველ ლეგიონერს მატჩის საუკეთესო მოთამაშის ტიტული ერგო და შანსია, ის ტურის MVP-იც გახდეს.
ტენერიფემ ამ მოგებით 34 ქულა დააგროვა და ჩემპიონატში მე-6 ადგილს იკავებს. შერმადინის გუნდი ჩემპიონატში მომდევნო მატჩს ფუენლაბრადასთან გამართავს, მანამდე კი ჩემპიონთა ლიგაზე თურქულ თოფასს ესტუმრება.
