თორნიკე შენგელია VTB-ლიგის ჩემპიონია! საქართველოს ეროვნული ნაკრების კაპიტანმა ფინალური სერიის მე-3 შეხვედრაც მაღალ დონეზე ჩაატარა და არმიელების წარმატებაში უმნიშვნელოვანესი როლი შეასრულა. ცსკა-მ ყაზანის უნიკსი სერიაში 3:0 დაამარცხა და VTB-ლიგის გამარჯვებული გახდა.
მოსკოვში გამართული გადამწყვეტი მატჩი არმიელებმა 89:81 მოიგეს. ქართველმა ლეგიონერმა 26:51 წუთი ითამაშა და 19 ქულა, 7 მოხსნა და 1 პასი მიითვალა. თორნიკემ 10-დან 8 ორქულიანი და 2-დან 1 სამიანი ჩააგდო, 2 საჯარიმო კი ააცილა. შენგელიას სარგებლიანობის ყველაზე მაღალი ინდექსი დაუგროვდა თანაგუნდელ დანიელ ჰაკეტთან ერთად. ორივეს მაჩვენებელმა 21-ს უწია. იტალიელმა ლეგიონერმა 17 ქულა, 5 მოხსნა და 3 პასი მიითვალა.
შენგელია VTB-ლიგის დღეს დასრულებულ სეზონში მატჩში საშუალოდ 23:10 წუთს თამაშობდა და 13.9 ქულას, 4.4 მოხსნას და 1.8 პასს ითვლიდა. მისი სარგებლიანობის ინდექსი საშუალოდ 13.1-ს შეადგენდა.
აღსანიშნავია, რომ თორნიკე შენგელია დაჯილდოებაზე საქართველოს ეროვნული დროშით წარსდგა და მთელი ცერემონიალის განმავლობაში ეროვნული ატრიბუტი არ მოუცილებია.
