გიორგი ცინცაძის „ბუდიველნიკმა“ უკრაინის ჩემპიონატის ფინალური სერია გამარჯვებით დაიწყო. კიეველები ქვეყნის უმთავრეს ტიტულს მარიუპოლის „აზოვმაშს“ ეცილებიან, რომელიც პირველ შეხვედრაში 89:82 დაამარცხეს.
ცინცაძის გუნდმა გამარჯვება ბრძოლაში მოიპოვა. კიეველებს ერთ-ერთი ლიდერი – ამერიკელი ლეო ლაიონსი დაუშავდათ, რომელმაც მხოლოდ 5 წუთი ითამაშა. პირველი მეოთხედი „ბუდიველნიკმა“ 14:24 წააგო და რთულ სიტუაციაში ჩავარდებოდა, თამაში მალევე რომ არ გამოესწორებინა. მეორე პერიოდში კიეველებმა 28:14 იძალეს და დიდ შესვენებაზე 4-ქულიანი ლიდერობით გავიდნენ.
მარიუპოლელებმა მაინც მონახეს ძალები და მესამე პერიოდის მოგებით გადამწყვეტ მეოთხედს 1-ქულიანი ლიდერობით შეეგებნენ, თუმცა მასპინძლებმა შესანიშნავად ითამაშეს დასკვნით ათწუთეულში და სერია გამარჯვებით დაიწყეს.
ცინცაძე სასტარტო ხუთეულში იყო და მოედანზე 29:32 წუთი გაატარა. ქართველი გამთამაშებელი ერთ-ერთი საუკეთესო იყო და პირად ანგარიშზე 14 ქულა, 4 პასი, 3 მოხსნა და 1 ჩაჭრა ჩაიწერა. ცინცაძე სავარაუდოდ მეტსაც მოაგროვებდა, მოედანი 5 პერსონალურის გამო რომ არ დაეტოვა. გიორგიმ 3-დან 1 ორქულიანი, 4-დან 2 სამიანი და 6-დან 6 საჯარიმო ჩააგდო. „ბუდიველნიკში“ 23 ქულით საუკეთესო დაინიუს სალენგა გახლდათ, ხოლო მალკოლმ დილეინის ანგარიშზე 17 დაგროვდა.
ფინალური სერიის მეორე მატჩი კვლავ კიევში, 17 მაისს გაიმართება, რის შემდეგაც სერია მარიუპოლში გადაინაცვლებს.
