კსუ-კავკასიამ ივერიონი დაამარცხა და სუპერლიგას დაუმარცხებლად ლიდერობს

სუპერლიგის მეექვსე ტური დასრულდა. მიმდინარე ჩემპიონატის ერთადერთმა დაუმარცხებელმა გუნდმა გააგრძელა წარმატებული სერია და მორიგი, მე-5 გამარჯვება მოიპოვა — კსუ „კავკასიამ“ გორის „ივერიონი“ დამაჯერებლად, 103:89 დაამარცხა. აღსანიშნავია, რომ მთავარმა მწვრთნელმა ბექა წივწივაძემ განაცხადში მყოფი 12-ივე კალათბურთელი ათამაშა, მათ შორის — 16 წლის ლევან გაჩეჩილაძე, რომლის დებიუტიც შედგა სუპერლიგაში. ახალგაზრდა მოთამაშემ 3:19 წუთში მოედანზე ყოფნისას მხოლოდ ერთი სამქულიანის სვ

როლა მოასწრო. „ივერიონმა“ წინააღმდეგობა ვერ გაუწია სუპერლიგის ნომერ პირველ ფავორიტს და როგორც მოსალოდნელი იყო, დამარცხდა.

მატჩი დაძაბულად დაიწყო, სადაც პირველ მეოთხედში მასპინძლებმა მცირე უპირატესობა მოიპოვეს (28:24), თუმცა მეორე პერიოდში „ივერიონმა“ თამაში გამოასწორა და მეოთხედი თავის სასარგებლოდ დაასრულა (25:27), რის გამოც დიდ შესვენებაზე გუნდები კავკასიელთა მინიმალური ლიდერობით გავიდნენ (53:51). მესამე პერიოდი გარდამავალი უპირატესობით წარიმართა და ფრედ, 25:25 დასრულდა, ხოლო დასკვნით, მეოთხე მეოთხედში კსუ „კავკასიამ“ სრული დომინაცია აჩვენა, პერიოდი 25:13 მოიგო და მატჩის ბედიც თავის სასარგებლოდ გადაწყვიტა.

გამარჯვებულთაგან ერთბაშად 7-მა კალათბურთელმა უწია 10-ქულიან ზღვარს, რომელთაგან 15-15 ქულა გიორგი ტურძილაძისა და ჯასტინ ფორესტის ანგარიშზეა. 15-15 ქულა ლუკა მაზიაშვილმა და შამარ რაითმა მიითვალეს. გორის გუნდში 19 ქულით საუკეთესო იყო მაიკა კლარკი.

რაც შეეხება სატურნირო ცხრილის მიმდინარე მდგომარეობას, სუპერლიგის ლიდერთა პოზიციებს დაუმარცხებელი კსუ „კავკასია“ და „რუსთავი“ იკავებენ, ხოლო ცხრილის ბოლო პოზიციაზე ჯერაც მოუგებელი და 6 წაგების მქონე „ბლექ ფორტრესია“.

სუპერლიგა მძაფრი და პრინციპული დაპირისპირებებით 5 დღეში განახლდება — წინ მე-7 ტურის შეხვედრებია, რომელიც ქართული კალათბურთის გულშემატკივრებს რამდენიმე ძალიან დაძაბულ შეხვედრას ჰპირდება. ტური 13 ნოემბერს, 14:00 საათზე, თბილისი არენაზე გამართული ცენტრალური მატჩით გაიხსნება, სადაც ერთმანეთს თსუ და დაუმარცხებელი კსუ კავკასია დაუპირისპირდებიან. იმავე დღეს, 18:30 საათზე, რუსთავის სპორტის სასახლეში რუსთავი ქუთაისს უმასპინძლებს. 14 ნოემბერს მატჩები ორ ქალაქში გაგრძელდება: 16:00 საათზე ბათუმის სპორტის სასახლეში ბათუმი თელავს მიიღებს, ხოლო 18:00 საათზე ტყიბულის სპორტის სასახლეში ერთმანეთს ორბი და სუპერლიგის დებიუტანტი ახალციხე დაუპირისპირდებიან. მე-7 ტური 15 ნოემბერს,ზესტაფონში დასრულდება, სადაც, 16:00 საათზე, მარგვეთი ბლექ ფორტრესს უმასპინძლებს.