საქართველოს კალათბურთის ეროვნულ ფედერაციას ახალი პრეზიდენტი ჰყავს.
40 რეგისტრირებული დელეგატიდან არჩევნებში მონაწილეობა 32-მა მიიღო, საიდანაც 29
დელეგატმა მხარი მიხეილ გაბრიჩიძეს დაუჭირა.
ვეტერანი კალათბურთელი, კომპანია “ჰიუნდაი-საქართველოსა” და
თბილისის კალათბურთის განვითარების კავშირის ვიცე-პრეზიდენტი მიხეილ გაბრიჩიძე
ფედერაციის პრეზიდენტობის დანარჩნი კანდიდატების – კახა შენგელიასა და ვლადიმერ
ბოისას რჩეულიც იყო. საარჩევნო პროცედურის დაწყების წინ შენგელიამ და ბოისამ
გაბრიჩიძის სასარგებლოდ კანდიდატურები მოხსნეს.
ფედერაციის პრეზიდენტობის კიდევ ერთმა კანდიდატმა – მიხეილ
ახვლედიანმა ყრილობა დატოვა. მისი განცხადებით, ყრილობა არალეგიტიმური იყო და
მასში მონაწილეობას არ იღებდა. ახვლედიანმა წაიკითა ის წერილი, რომელიც ფიბა-მ
საქართველოს სპორტისა და ახალგაზრდობის საქმეთა სამინისტროს გამოუგზავნა და
რომელიც სამინისტროს ვებ-გვერდზეა განთავსებული. http://msy.gov.ge/files/categoris/kalatburti/2013/dek/FIBA/docs.pdf
მოგვიანებით, ყრილობის წამყვანმა, წინა გამგეობის წევრმა გიორგი
ქართველიშვილმა ის წერილი წაიკითხა, რომელიც ფიბა-ს გენერალურმა მდივანმა პატრიკ
ბაუმანმა ფედერაციის ყოფილ პრეზიდენტ ბესიკ ლიპარტელიანს გუშინ გამოუგზავნა და
საიდანაც ნათლად ჩანს, რომ ფიბა წესდებაში ცვლილებების შესატანად თანამშრომლობას
ახალ არჩეულ პრეზიდენტთან აპირებს და არანაირად არ ერევა 11 დეკემბერს გასამართ
არჩევნებში http://gbf.ge/news.php?m=news&d=&id=4652
ახვლედიანმა მოუწოდა დელეგატებს, არ მიეღოთ ყრილობაში მონაწილეობა.
მისი თხოვნა 5-მა დელეგატმა გაითვალისწინა და დარბაზიდან გასულ ახვლედიანს გაჰყვა.
ესენი იყვნენ სკ “ოლიმპის”, სკ “ქუთაისის”,
სკ”სოხუმის”, სკ “არმიისა” და ქუთაისის სპორტსკოლის მიერ
მოვლინებული დელეგატები.
ყრილობაზე დარჩნენ და არჩევნების გამართამდე გამართულ საქმიან
საუბარში მონაწილეობა მიიღეს თბილისის კალათბურთის ფედერაციის, სკ
“დინამოს” და მიხეილ კეკელიძის სახელობის კალათბურთის ოლიმპიური
მზადების სპორტული ცენტრის წარმომადგენლებმა, თუმცა არჩევნებში მონაწილეობაზე
მათაც უარი განაცხადეს. შესაბამისად, საანგარიშო ყრილობაზე მოსული 40-ივე
დელეგატიდან არჩვნებში მონაწილეობა 32-მა მიიღო. 29 მათგნმა მხარი გაბრიჩიძეს
დაუჭირა, ერთმა მიხეილ ახვლედიანის კანდიდატურა შემოხაზა, 2 ბიულეტინი კი ხმის
მიცემის პროცედურების დარღვევის გამო ბათილად ჩაითვალა.
მიხეილ გაბრიჩიძის პრეზიდენტად არჩევის შემდეგ დღის წესრიგის მიხედვით
ფედერაციის გამგეობის წევრები აირჩიეს. ყრილობის დელეგატებმა ერთხმად დაუჭირეს
მხარი ახალი პრეზიდენტის მიერ წარდგენილ გამგეობის წევრებს შემდეგი შემადგენლობით:
ნოდარ ქორქია, ვალერი ლომაძე, გივი ბიჭიაშვილი, კახა შენგელია, ვლადიმერ ბოისა,
გიორგი ქართველიშვილი, თემურ დათიკაშვილი, გია სანაძე და მიხეილ გაბრიჩიძე.
სხდომის თავმჯდომარის წარდგინებით ახალმა გამგეობამ ყრილობის პირველი
დავალება რამდენიმე წუთში მიიღო. დელეგატების სურვილი პირველ რიგში ახალი წესდების
შემუშავებაა და ამაზე გამგეობა უახლოეს მომავალში სპორტის სამინისტროსთან და
ფიბა-სთან კონსულტაციების პარალელურად იმუშავებს.
ყრილობის მსვლელობისას და მისი დასრულების შემდეგ კომენტარები გააკეთს
სპორტის სამინისტროსა და ოლიმპიური კომიტეტის წარმომადგენლებმა, ასევე
დელეგატებმა:
ირაკლი დოლაბერიძე, სპორტისა და ახალგაზრდობის საქმეთა მინისტრის მოადგილე:
“რაც ახლა აქ ტარდება, ესაა ჩემთვის ნათელი მაგალითი იმისა, თუ
როგორ უნდა ტარდებოდეს არჩევნები. ვიღაცა გულნატკენი იქნება, ვიღაცა უსამართლოდ
ჩათვლის, მაგრამ რაც მთავარია, აქ არაა ადრინდელივით წინასწარ დანიშნული
კანდიდატები, სადაც სპორტის სამინისტროსა და ოლიმპიური კომიტეტის წარმომადგენლები
არა სტუმრის სტატუსით იყვნენ წარმოდგენილნი, როგორც ეხლა ვართ, არამედ არჩევნებში
მონაწილეობდნენ და ყველაფერი წინასწარ იყო ცნობილი. მე პატივს ვცემ იმ არჩევნს,
რომელსაც თქვენ ამ ყრილობაზე დააფიქსირებთ. ეს ყრილობა არაა არაკანონიერი, რადგან
ამას არეგისტრირებს მარეგისტრირებელი ორგანო საქართველოს კანონმდებლობიდან
გამომდინარე. ასე რომ, კანონმდებლობით დარეგისტრირებულ ფედერაციაში გადაწყვეტილებებს
იღბთ თვენ, საკალათბურთო სამყარო და არა სპორტის სამინისტრო, ან ოლიმპიური
კომიტეტი. ამიტომ ჩვენ პატივს ვცემ თქვენს არჩევანს და შეფასებებს. კალათბურთის
სამყარომ უნდა შეაფასოს ფედერაციის საქმიანობა, რომელიც კარგია თუ ცუდი, თქვენი
შესაფასებელია. მე არც ერთ კანდიდატს არ ვემხრობი, თუმცა ძალიან მომეწონა ვლადიმერ
ბოისას გუშინდელი განცხადება, რომელმაც თქვა, მოვიგებ თუ წავაგებ, მე ვიქნები
ქართული კალათბურთის ოჯახშიო”.
მამუკა ხაბარელი, ოლიმპიური კომიტეტის ვიცე-პრეზიდენტი:
“ჩემთვის დასაფასებელი ისაა, რომ აქ თითოეული ადამიანი არის
ქართული კალათბურთის სამყაროს წარმომადგენელი. მიუხედავად იმისა, რომ ჩვენ
შეგვეძლო ვყოფილიყავით ყრილობის დელეგატები, ამას საქართველოს კანონმდებლობა არ
კრძალავს, მაგრამ ჩვენ აქ ვართ სტუმრის სტატუსით”.
გივი ბიჭიაშვილი, კალათბურთის ფედერაციის გამგეობის
წევრი:
“ახალი პრეზიდენტი გვყავს და შესაბამისად, ბევრი რამ შეიცვლება. ვფიქრობ, საქართველოში
არჩევნები ასე დემოკრატიულად არასდროს ჩატარებულა. ბუნებრივია, ყველას თავისი სიმპათიები აქვს. გაბრიჩიძე განათლებული ადამიანია და ვფიქრობ, წარმატებას მიაღწევს”.
ზაზა გაბისონია, ქვემო ქართლის
მხარის კალათბურთის ფედერაციის გამგეობის წევრი:
“როდესაც რუსთავში გვქონდა გემგეობასთან
შეხვედრა, უმთავრესად ვითხოვდით რომ დელეგატები თავისუფლები ყოფილიყვნენ
არჩევანში. დღეს ეს ნამდვილად იყო. დღევანდელი ყრილობის შედეგებით კმაყოფილნი
ვართ. მთავარია რომ დელეგატები არჩევანში თავისუფლები იყვნენ”.
ოთარ ბრაგვაძე, კახეთის
კალათბურთის ფედერაციის პრეზიდენტი:
“მოხარული ვარ, რომ ყველაფერმა კარგად ჩაიარა.
სამართლიანობამ გაიმარჯვა და კალათბურთის ფედერაციამ დაამტკიცა, რომ ერთიანი
გუნდია და ამით სხვა სპორტის სახეობებს კარგი მაგალითი აჩვენა”.
იაგო რუსიშვილი, გორის სასპორტო
სკოლის დელეგატი:
“დღვანდელი დღე ასეც უნდა დასრულებულიყო,
ყველაფერი კარგად არის და იმედია, მომავალშიკალათბურთში კიდევ უფრო უკეთესი
სიტუაცია გვექნება. მიხეილ გაბრიჩიძე კარგი კალათბურთელიც იყო და შესანიშნავი
პიროვნებაცაა. მთავარია, ბოლომდე ერთად ვიდგეთ საკალათბურთო სამყარო. ბევრი შრომა
გასწია ფედერაციამ და ის პატარ-პატარა ლაფსუსებიც მომავლისთვის გამოსწორდება.
ერთად ვითანამშრომლებთ და იმედია, ახალი პრეზიდენტი როგორც დაგვპირდა, ჩვენი
რეგიონის მიმართ სათანადო ყურადღებას გამოიჩენს”.
ნოდარ იანქოშვილი, თელავის სასპორტო
გაერთიანების დელეგატი: დადებითად შევაფასებდი დღევანდელ ყრილობას. სიმართლემ გაიმარჯვა და
შედეგით, რა თქმა უნდა, კმაყოფილი ვარ.
ამირან ხაჩიძე, საკალათბურთო
კლუბი “რუსთავი 1991”-ის დელეგატი:
ასეთი დემოკრატიული არჩევნები ჯერ არ მინახავს.
ყველაფერმა კარგად ჩაიარა. ყრილობას ესწრებოდნენ ოლიმპიური კომიტეტის
ვიცე-პრეზიდენტი მამუკა ხაბარელი და სპორტისა და ახალგაზრდობის საქმეთა მინისტრის
მოადგილე ირაკლი დოლაბერიძე, რომლებმაც ყრილობა იქვე ადგილზევე დადებითად
შეაფასეს.
