ნახევარფინალის მონაწილეები ცნობილია, წყვილები – არა

შედეგები 20-წლამდელთა
ჩემპიონატის რეგულარული ჩემპიონატი დასასრულს უახლოვდება. რამდენიმე მატჩიც და მეოთხე
წრე დასრულდება, რაც იმას ნიშნავს, რომ პლეი ოფისთვის გუნდები ნახევარფინალში დაწყვილდებიან.

პლეი ოფში გასული
4 გუნდის ვინაობა ცნობილია: ოლიმპი, აკადემია, სოხუმი და რუსთავი. გუნდები ცხრილში
ამ თანმიმდევრობით არიან და შესაძლოა, დარჩნენ კიდეც, თუმცა შესაძლებელია, რამდენიმე
ცვლილება მოხდეს.

ვერავინ შეეხება
ოლიმპს, რომელსაც პირველობა კარგა ხანია განაღდებული ჰქონდა. სოხუმმა დღეს დრამატული
ბრძოლა გადაიტანა აუტსაიდერ მაკაბისთან, რომელსაც 1 ქულით – 73:72 სძლია და აკადემიის
გადასწრების შანსი დაიტოვა.

დღესვე, საკალათბურთო
აკადემიის დარბაზში ოლიმპმა ქუთაისი ზედმეტი პრობლემების გარეშე დაამარცხა. მატჩის
ბომბარდირი 22 ქულით ოლიმპელი დავით ლომიძე გახდა, ხოლო არჩილ პულუზაშვილის წილი გამარჯვებაში
20 ქულა და 12 მოხსნა გახლდათ.

რეგულარული ჩემპიონატის
დასრულებას 5 მატჩის გამართვა უკლია. ნახევარფინალში გუნდები შემდეგნაირად დაწყვილდებიან:
პირველი მეოთხეს შეხვდება, ხოლო მეორე – მესამეს. როგორც ნახევარფინალში, ისე ფინალში
სერია 2 მოგებამდე გაგრძელდება.