სტატისტიკა
გალერეა
20-წლამდელთა
ჩემპიონატის პლეი ოფის პირველ დღეს საკალთბურთო აკადემიის დარბაზმა უმასპინძლა. ნახევარფინალური
სერიები „შსს-აკადემიისა“ და „ოლიმპის“ დაპირისპირებით დაიწყო.
რეგულარული ჩემპიონატის
გამარჯვებულმა „შსს აკადემიამ“ „ოლიმპს“ უმასპინძლა და დაძაბულ ბრძოლაში – 59:53 დაამარცხა,
სერიაში 1:0 დაწინაურდა და თუკი მომდევნო შეხვედრასაც მოიგებს, ფინალში გავა.
მიუხედავად იმისა,
რომ ,,ოლიმპი’’ პლეი ოფში ბოლო ტურში „რუსთავის“ ძლევით გავიდა, მიმდინარე სეზონში
მხოლოდ 2 მატჩის წამგებ შსს-ს მედგარი წინააღმდეგობა გაუწია. მწყობრი დაცვის ხარჯზე
ოლიმპელები პირველ ტაიმში ახერხებდნენ აკადემიელთა შეტევების შეჩერებას, თავად კი შეტევაში
ყოჩაღობდნენ. შედეგად, პირველი მეოთხედი 18:15 მოიგეს, დიდი შესვენებისთვის კი უკვე
5 ქულით ლიდერობდნენ – 30:25.
მეორე ტაიმი
„შსს აკადემიის“ შეტევებით განახლდა. გიორგი ნიკოლაძის გაწვრთნილმა აკადემიელებმა მოახერხეს
ოლიმპელთა დაცვითი ბარიერის დაშლა და ჯერ ანგარიში გაათანაბრეს, შემდეგ კი დაწინაურდნენ
კიდეც. მე-3 პერიოდი აკადემიელებმა 22:11 მოიგეს და გადამწყვეტი ათწუთეულის წინ 6 ქულით
დაწინაურდნენ.
ჩამორჩენილი ოლიმპელები
მეტოქეს შორს არ უშვებდნენ და ბოლომდე ინარჩუნებდნენ შანსს, თუმცა მატჩისთვის განკუთვნილი
დრო ისე ამოიწურა, ზაზა ცაგარეიშვილის გუნდმა ამ შანსის გამოყენება ვერ მოახერხა და
შეხვედრა 53:59 დათმო.
„შსს აკადემიაში“
18 ქულით საუკეთესო ლევან ლოლიშვილი იყო, ორმაგი დუბლი (13 ქულა, 10 პასი) მოაგროვა
შოთა გელაზონიამ, ხოლო ლერი კვანტალიანმა თამაში 14 ქულით დაასრულა. „ოლიმპში“ 15 ქულა
და 5 პასი ირაკლი მიქელაძემ მიითვალა, ბექა ნადირაძემ კი ორმაგი დუბლი დააგროვა –
11 ქულა, 12 მოხსნა.
მატჩისშემდგომი კომენტარები
გიორგი ნიკოლაძე (,,შსს აკადემიის’’ მთავარი მწვრთნელი): მივულოცავ ჩვენს
გუნდს დღევანდელ გამარჯვებას. უამრავი ხარვეზი
გქვონდა, განსაკუთრებით კი შეტევაში. „ოლიმპი“
ძალიან კარგად დაკომპლექტებული გუნდია და ასეთ რთულ თამაშს ველოდებოდი კიდეც. ვფიქრობ,
ხვალ კიდევ უფრო დაძაბული შეხვედრა გვექნება.
ზაზა ცაგარეიშვილი (,,ოლიმპის’’ მთავარი მწვრთნელი):
კარგი თამაში იყო. პირველ ნახევარში ბიჭებმა მაქსიმალურად შეასრულეს მითითებული დავალებები,
თუმცა მეორე ტაიმში ჩავარდნა გვქონდა და ეს შედეგზეც აისახა. სერია 2 მოგებამდე გრძელდება, ჩვენი განწყობა საკმაოდ
მაღალია და ყველაფერს გავაკეთებთ სასურველი შედეგის მიღწევისთვის.
ლევან ლოლიშვილი(,,შსს აკადემია’’): საკმაოდ ძლიერი
მეტოქე გვყავს, დღეს ძალიან კარგად ითამაშეს, თუმცა, ჩვენგან განსხვავებით, არ გაუმართლათ.
ხვალ უფრო მოვინდომებთ და შევეცდებით, სერია ჩვენს სასარგებლოდ დავასრულოთ.
ნოდარ გოგოძე(,,ოლიმპი’’): ,,შსს აკადემია’’
რეგულარულის გამარჯვებული, ჩემპიონობის მთავარი კანდიდატი და ძალიან ძლიერი მოწინააღმდეგეა.
სამწუხაროდ, დღეს ბევრი შეცდომა დავუშვით. შევეცდებით, საპასუხო შეხვედრაში იგივე ხარვეზები
აღარ გვქონდეს.
