პირველად XXI საუკუნეში: ერთ სეზონში ევროტურნირებზე 2 ქართული კლუბი იასპარეზებს

ქართულ კალათბურთში მიმდინარე საუკუნეში პირველად ხდება, რომ ევროპულ ტურნირებზე ერთ სეზონში 2 ქართული გუნდი იასპარეზებს. ასეთ შემთხვევას ბოლოს ადგილი 90-იან წლებში ჰქონდა, როცა “ვითასთან” ერთად ევროთასებზე (კორაჩის თასზე) “მერანი”, ხან ” კაკტუსი” ნახაც “შევარდენი” გამოდიოდა. მას მერე, თითქმის 30 წლის შემდეგ პირველად ხდება, რომ საერთაშორისო ასპარეზზე ერთბაშად ორი ქართული კლუბი იბრძოლებს. ქვეყნის მოქმედი ჩემპიონი „ბათუმი“ ძალებს FIBA-ს ჩემპიონთა ლიგაზე მოსინჯავს და თუკი ჯგუფში ვერ მოხვდა, FIBA Europe Cup-ზე გადაინაცვლებს, ხოლო კავკასიის საერთაშორისო უნივერსიტეტის გუნდი კსუ ევროპის ჩრდილოეთის საკალათბურთო ლიგას (ENBL) ოფიციალურად დღეს შეემატა.

ტურნირის ოფიციალურმა ვებ-გვერდმა უკვე დაადასტურა, რომ ევროპულ რუკას კიდევ ერთი ქალაქი — თბილისი — შეემატა.

რა არის ENBL და რას წარმოადგენს ტურნირი?

ევროპის ჩრდილოეთის საკალათბურთო ლიგა 2021 წელს ლატვიაში დაარსდა. მიუხედავად იმისა, რომ ტურნირი შედარებით ახალია, მან მოკლე დროში მოიპოვა მაღალი რეპუტაცია და გეოგრაფიული არეალიც საგრძნობლად გააფართოვა. ENBL FIBA Europe-ის პატრონაჟითა და ოფიციალური აღიარებით ტარდება — მატჩები FIBA-ს სტანდარტებითა და ლიცენზირებული მსაჯებით მიმდინარეობს, ხოლო კალენდარი სრულად ითვალისწინებს სანაკრებო ფანჯრებს.

ტურნირის არსებობის მანძილზე ჩემპიონობა ისეთმა გუნდებმა იზეიმეს, როგორებიც არიან პოლონური „ანვილი“, „სტალი“, დანიური „ბაკენ ბიარსი“ და რუმინული „ვოლუნტარი“.

ჯგუფური ეტაპი და მეტოქეები

ახალ სეზონში კსუ A ჯგუფში იასპარეზებს, სადაც საკმაოდ სერიოზული და საინტერესო კონკურენცია ელის:

• A ჯგუფი: კსუ (საქართველო), „იონავა“ (ლიეტუვა), „ლიეპაია“ (ლატვია), „ბრისტოლი“ (დიდი ბრიტანეთი), „ჰეფტე ჰელფენი“ (ავსტრია), „ლოზანა“ (შვეიცარია), „მიტელდოიჩერი“ (გერმანია), „ტინდასტოლი“ (ისლანდია) და ხორვატიის წარმომადგენელი („ალკარი“, „დინამო ზაგრები“, „დუბრავა“ ან „ზაბოკი“).

• B ჯგუფი: „ანვილი“ (პოლონეთი), „სპარტაკი პლევენი“ (ბულგარეთი), „ვოლუნტარი“ (რუმინეთი), „გრონინგენი“ (ნიდერლანდები), „ფალინგენი“ (ნორვეგია), „ზრინსკი“ (ბოსნია-ჰერცეგოვინა), „ტალტეხი“ (ესტონეთი), „აელ ლიმასოლი“ (კვიპროსი) და ხორვატიის წარმომადგენელი.

კსუ-ს შემადგენლობა

საერთაშორისო დებიუტისთვის სერიოზულად ემზადება თბილისური კლუბის ხელმძღვანელობაც. კსუ-მ შემადგენლობა როგორც გამოცდილი ქართველი კალათბურთელებით, ისე ხარისხიანი ლეგიონერებით გააძლიერა. გუნდის ღირსებას დაიცავენ:

დავით კაკუშაძე, აკაკი დვალიშვილი, რევაზ როგავა, სანდრო სანაძე, გეგი ბაქრაძე, ალექსანდრე ვაშაკიძე, გიორგი კოსტავა, ჯასტინ ფორესტი, შამარ რაითი, ტომი ლუისი და ბრეილენ ბრიჯესი.

კსუ-ს მატჩების კალენდარი ENBL-ს რეგულარული ჩემპიონატში:

თბილისური გუნდი ჯგუფურ ეტაპზე 8 შეხვედრას ჩაატარებს — 4-ს შინ და 4-ს სტუმრად:

• 29 სექტემბერი, 2026: ხორვატია 1 vs კსუ (სტუმრად)

• 7 ოქტომბერი, 2026: კსუ vs იონავა (სახლში)

• 14 ოქტომბერი, 2026: კსუ vs ლოზანა (სახლში)

• 11 ნოემბერი, 2026: კსუ vs მიტელდოიჩერი (სახლში)

• 18 ნოემბერი, 2026: ეფთე ჰელფენი vs კსუ (სტუმრად)

• 9 დეკემბერი, 2026: ლიეპაია vs კსუ (სტუმრად)

• 6 იანვარი, 2027: კსუ vs ბრისტოლ ფლაიერსი (სახლში)

• 19 იანვარი, 2027: ტინდასტოლი vs კსუ (სტუმრად)