სოფელ დიცში, საოკუპაციო ხაზთან ახლოს, საკალათბურთო აკადემია გაიხსნა

გორის მუნიციპალიტეტის სოფელი დიცის საჯარო სკოლაში საკალათბურთო აკადემია გაიხსნა. ეს გახლავთ საოკუპაციო ხაზთან ყველაზე ახლოს მდებარე საკალათბურთო სექცია, რომელიც საჯარო სკოლის ბაზაზე, მთლიანად საქართველოს კალათბურთის ეროვნული ფედერაციის სპეციალური პროგრამით მიღებული ინვენტარითა და ატრიბუტიკით გაიხსნა.

დიცში საკალათბურთო სკოლის გახსნის ინიციატორი ადგილობრივი აქტივისტი, არაერთი პროგრამისა და ღონისძიების ორგანიზატორი, გიორგი სამხარაძე გახლდათ, რომელმაც ისარგებლა კალათბურთის ფედერაციის მიერ წარმოებული “კალათბურთის განვითარების” პროგრამის მხარდაჭერით და საოკუპაციო ხაზიდან 400 მეტრში, სოფელ დიცის სკოლის სპორტულ დარბაზში საკალათბურთო წრე დააფუძნა.

მიღებული ინვენტარით პირველ ეტაპზე სკოლის სპორტის მასწავლებლები ისარგებლებენ და დაინტერესებულ ბავშვებს კალათბურთში მოამზადებენ. უახლოეს მომავალში ფედერაცია გეგმავს დიცის სკოლის მასწავლებელთა შესაბამისი მიმართულებით გადამზადებას, საკალათბურთო სემინარებისა და საჩვენებელი ვარჯიშების ჩატარებას, რაც ხელს შეუწყობს ახალი აკადემიის დამწყებთათვის დამაკმაყოფილებელ დონეზე ფუნქციონირებას. 

დიცის საჯარო სკოლაში აკადემიის საზეიმო გახსნა მოეწყო, რომელსაც საოკუპაციო ხაზის ტერიტორიაზე განლაგებული ევროკავშირის სამშვიდობო მისიის თანამშრომლებიც დაესწრნენ. სკოლაში საკალათბურთო ინვენტარი 2 კვირის წინ გაიგზავნა – ნაჩუქარი ფარები დამონტაჟდა, მოეწყო გასახდელები, ფორმები და ბურთები ბავშვებს დაურიგდათ. 21 იანვარს კი მთელმა სკოლამ თავი სპორტულ დარბაზში მოიყარა, სადაც ნასტუმრებ ფედერაციის წარმომადგენლებთან ერთად საკალათბურთო აკადემია საზეიმოდ გახსნეს. T

შეგახსენებთ, რომ კალათბურთის განვითარების პროგრამის ფარგლებში ფედერაციის რეგიონულ დეპარტამენტს მთელი საქართველოს მასშტაბით ჩააქვს ინვენტარი და ეს პროცესი ინტენსივობასთან ერთად გეოგრაფიას ზრდის. საოკუპაციო საზღვრისპირა სოფლებში საკალათბურთო აკადემიების გახსნის პროცესი მომავალშიც გაგრძელდება – ფედერაციის პროგრამით ყველა სკოლა, რომელიც საკალათბურთო აქტივობის მზადყოფნას გამოთქვამს, საჭირო ინვენტარს და ატრიბუტიკას მიიღებს.