ბექა წივწივაძის მომზადებულმა გუნდმა, რომელსაც სტუდენტების სექტორი მთელი თამაშის განმავლობაში ხმაურიანად და ემოციურად ქომაგობდა, შვეიცარიული „პული ლოზანა ფოქსის“ დაძაბულ ბრძოლაში, 9-ქულიანი სხვაობით — 97:88 დაამარცხა. აღსანიშნავია, რომ ეს გახლავთ ბექა წივწივაძის სადებიუტო გამარჯვება ENBL-ზე მთავარი მწვრთნელის რანგში.
შეხვედრის პირველი ნახევარი ძალიან სწრაფ, მაღალპროდუქტიულ და შედეგიან ტემპში გაილია. კსუ-მ პირველ ორ მეოთხედში 28 და 30 ქულა ჩააგდო და შესვენებაზე 13-ქულიანი უპირატესობით (58:45) გავიდა. პირველ 20 წუთში მასპინძლებმა თამაშიდან სროლების ფენომენალური, 68%-იანი სიზუსტე (20/29) აჩვენეს (სტუმრების 45%-ის წინააღმდეგ).
დიდი შესვენების შემდეგ „ლოზანამ“ დაცვაში კორექტირებები შეიტანა და მესამე მეოთხედის ბოლოს სხვაობა 6 ქულამდე შეამცირა (76:70). მატჩის დასასრულისკენ შვეიცარიელებმა ანგარიში კიდევ უფრო სახიფათოდ შეამცირეს (85:82 და 87:84), თუმცა, სწორედ ამ კრიტიკულ მომენტში თავისი სიტყვა თქვა სანდრო სანაძემ. შეხვედრის დასრულებამდე 2 წუთზე ნაკლები იყო, სანაძემ უმნიშვნელოვანესი, გამარჯვების სამქულიანი რომ ჩააგდო და მასპინძლების უპირატესობა ექვს ქულამდე გაზარდა (90:84). საერთო ჯამში, სანდრომ ბოლო ორ წუთში 5 ქულა მიითვალა და მატჩის ბედის გადაწყვეტაში უდიდესი როლი შეასრულა.
-
სანდრო სანაძე — გუნდის ბომბარდირი გახდა 23 ქულით. მან თამაშიდან 10-დან 7 ტყორცნა გამოიყენა, ხოლო საჯარიმოს ხაზიდან აბსოლუტური სიზუსტე (6/6) აჩვენა.
-
ჯასტინ ფორესტი — 13 ქულა დააგროვა.
-
ტომი ლუისი — 12 ქულა და 5 შედეგიანი გადაცემა მიითვალა (ფორესტმა და ლუისმა გადამწყვეტ, მეოთხე მეოთხედში ერთობლივად 9 ქულა ჩააგდეს).
-
აკაკი დვალიშვილი — გამოცდილმა ცენტრმა 15 ქულა და 9 მოხსნა ჩაწერა აქტივში.
სტუმართა რიგებში საუკეთესო იყო ბრენდან ფავრი (20 ქულა, 4/7 სამქულიანი), ხოლო ახალგაზრდა ლუკას კერედზინმა 19 ქულა და 8 პასი დააგროვა. ამ გამარჯვების შემდეგ კსუ-ს ENBL-ის A ჯგუფში 1-1 ბალანსი აქვს, ხოლო „ლოზანა ფოქსესი“ 0-3-ზე დაქვეითდა. კსუ მიმდინარე სეზონში საკუთარ მოედანზე უძლეველია (3-0) — “ლოზანას” ძლევამდე მათ საქართველოს სუპერლიგაში „ბლექ ფორტრესი“ (108:84) და „ქუთაისი“ (97:65) დაამარცხეს.
