ზაზა ფაჩულიას აკადემიის გუნდი U14 ჩემპიონი ისე გახდა, თამაში არ წაუგია

საქართველოს 14-წლამდელთა ჩემპიონატის გამარჯვებული ზაზა ფაჩულიას აკადემიის გუნდი გახდა. ნიკა სოლოღაშვილის გაწვრთნილმა შეგირდებმა ფინალური სერიის მეორე მატჩიც დამაჯერებლად, 101:58 მოუგეს “თბილისი ბასკეტს” და ჩემპიონის ტიტული სრულიად დამსახურებულად მოიპოვეს.

ზფა-მ მიმდინარე სეზონში ფენომენალური შედეგი აჩვენა. რეგულარულ ჩემპიონატში მოპოვებულ 24 გამარჯვებას პლეი-ოფში კიდევ 6 უცვლელი მოგება დაუმატა, თითოეულ სერიაში 2-2 მატჩი მოიგო და სეზონი უნიკალური, 30-0 ბალანსით, საერთოდ წაუგებლად დახურა. ზაზას აკადემიამ ტურნირი, რომ იტყვიან, ერთი ამოსუნთქვით განვლო.

ფინალური აკორდის შემდეგ, საზეიმო დაჯილდოების ცერემონიალზე, აკადემიელებმა დამსახურებულად ჩაიბარეს კუთვნილი ოქროს მედლები, ხოლო ვიცე-ჩემპიონ “თბილისი ბასკეტს” ვერცხლის ჯილდოები ერგო. გუნდები მედლებით კალათბურთის ეროვნული ფედერაციის საშეჯიბრო დეპარტამენტის უფროსმა კობა კობიაშვილმა და მისმა მოადგილემ გიორგი ჯაფარიძემ დააჯილდოვეს.

საინტერესო ფაქტი, რომელსაც გვერდს ვერ ავუვლით: ზფა-ს ამ საჩემპიონო შემადგენლობაში ქართული კალათბურთის გულშემატკივრებისთვის კარგად ნაცნობი, ვეტერანი მოთამაშეების მომავალი თაობა იზრდება. გუნდის ღირსებას კოტე ტუღუშის, ბექა წივწივაძისა და ვახტანგ მინაშვილის შვილები იცავენ. ამავე გუნდში ითამაშა რეგულარული ჩემპიონატის უმეტესი მატჩები ანატოლი ბოისას შვილმაც, რომელსაც ყოფილ თანაგუნდელებთან ერთად საჩემპიონო მედალი ერგო.

მესამე ადგილისთვის მატჩი 14 ივნისს გაიმართება: “რუსთავი” “მენ სანას” უმასპინძლებს.