მხოლოდ 3 დაკარგული ბურთი — საქართველოს ნაკრებმა მონტენეგრო გაანადგურა

საქართველოს ეროვნულმა ნაკრებმა მსოფლიოს 2027 წლის ჩემპიონატის საკვალიფიკაციო ტურნირის მეორე ჯგუფური ეტაპი დამაჯერებელი გამარჯვებით გახსნა. ალექსანდარ ჯიკიჩის გაწვრთნილმა გუნდმა საკმაოდ ძლიერი მონტენეგრო 27 ქულის სხვაობით გაანადგურა. ეს ის მონტენეგროა, რომელმაც პირველ ეტაპზე B ჯგუფში პირველი ადგილი დაიკავა და ახლა საქართველოსთან და სხვა 4 ქვეყნის ნაკრებთან ერთად მსოფლიო ჩემპიონატზე გასასვლელად იბრძვის. თუმცა, ამ მარცხის შემდეგ ბალკანელთა შანსები მნიშვნელოვნად შემცირდა. საქართველოს ნაკრებმა თავის ისტორიაში ერთ-ერთი საუკეთესო მატჩი ჩაატარა და ოთარ ქორქია-ნოდარ ჯორჯიკიას სახელობის ახალ სპორტის სასახლეში შეკრებილი გულშემატკივარი აღაფრთოვანა.

ჩვენმა გუნდმა 100-ქულიან ბარიერს გადააბიჯა, მეტოქე 101:74 დაამარცხა და ეს ყველაფერი შთამბეჭდავი მომენტების თანხლებით გააკეთა. მოედანზე იყო ყველაფერი: ეფექტური ჩატენვები, ულამაზესი პასები, საჭირო სამქულიანები, დაფარებები და ჩაჭრები. ყველაფერზე უკეთ ერთ დეტალი მეტყველებს: საქართველოს ნაკრებმა მთელი მატჩის განმავლობაში მხოლოდ 3 ბურთი დაკარგა (მაშინ, როცა მეტოქეს 16 დაკარგვა ჰქონდა, აქედან 12 — ქართველების ჩაჭრის შედეგად). ოფიციალური სტატისტიკა ხელთ არ გვაქვს, თუმცა, დიდი ალბათობით, ეს ეროვნული გუნდისთვის ყველა დროის სარეკორდო მაჩვენებელია.

სწორედ ამ დეტალს გაუსვა ხაზი პრესკონფერენციაზე ნაკრების სერბმა მთავარმა მწვრთნელმა:

„ას ქულაზე მეტი ჩავაგდეთ და მხოლოდ სამი ბურთი დავკარგეთ — ამაზე მეტი ბედნიერება რა უნდა იყოს?!“

ალექსანდრე ჯიკიჩის განცხადებით, ეს არ ყოფილა იოლად მოპოვებული გამარჯვება. ქართველებმა მეტოქე მხოლოდ ბოლო პერიოდში გატეხეს, მანამდე კი მონტენეგრო ნიადაგ კვალშ ი გვედგა. თამაში საქართველოს ნაკრების 15-ქულიანი ლიდერობით დაიწყო, თუმცა ბალკანელთა ზუსტი სროლების წყალობით სხვაობა პერმანენტულად მცირდებოდა და პირველი ნახევრის ბოლოს მინიმუმამდეც დავიდა. მეორე პერიოდის ბოლო წამებზე თორნიკე შენგელიას ჩინებულმა თამაშმა ტაბლოზე 48:42 დააფიქსირა.

მესამე პერიოდიდან საქართველოს ნაკრების უპირატესობა უკვე აშკარა გახდა, რაც აგრესიული დაცვისა და სწრაფი შეტევების შედეგი იყო. ამას დაერთო გოგა ბითაძისა და სანდრო მამუკელაშვილის სამქულიანები, ასევე თორნიკე შენგელიას დომინაცია ფარქვეშ. გადამწყვეტ 10-წუთეულში კი ჩვენმა გუნდმა სრული სტაბილურობა გამოავლინა, მეოთხედი 24:7 მოიგო და საბოლოო განაჩენი

გამოიტანა.

რთულია ვინმეს გამოყოფა, თუმცა დიდებულად ითამაშა ეროვნული გუნდის სუპერტრიომ:

• გოგა ბითაძე: 23 ქულა, 8 მოხსნა, 2 პასი, 2 დაფარება (მატჩის ყველაზე ეფექტური მოთამაშე);

• თორნიკე შენგელია: 24 ქულა, 7 მოხსნა, 2 პასი, 2 ჩაჭრა;

• სანდრო მამუკელაშვილი: 17 ქულა, 7 მოხსნა, 6 პასი, 2 ჩაჭრა.

წამყვან ტრიოს ჩინებულად აჰყვნენ ნატურალიზებული ამერიკელი მარკის რიდი (12 ქულა, 8 პასი) და რატი ანდრონიკაშვილი, რომელმაც შეხვედრა 100%-იანი სიზუსტით დაასრულა და 9 ქულასთან ერთად 3 პასიც მიითვალა.

ჩვენს ჯგუფში ჩატარებულ სხვა მატჩებში უკრაინამ საბერძნეთი დაამარცხა, ხოლო პორტუგალიამ სტუმრად ესპანეთს მოუგო. თუ პირველი შედეგი სატურნირო თვალსაზრისით ჩვენთვის მეტ-ნაკლებად ხელსაყრელია, პორტუგალიელთა გამარჯვება აშკარად არ გვაწყობდა.

სწორედ პორტუგალიაა საქართველოს ნაკრების შემდეგი მეტოქე. მატჩი 31 აგვისტოს, პორტოში გაიმართება და გამარჯვების შემთხვევაში, ალექსანდრე ჯიკიჩის გუნდი მსოფლიო ჩემპიონატის საგზურისკენ უდიდეს ნაბიჯს გადადგამს.