ესტონეთის ქალაქ ტარტუში მიმდინარე ევროპის ახალგაზრდულ ლიგის მესამე წრეში პირველი გამარჯვება მოიპოვა საქართველოს 16-წლამდელთა ნაკრებმა. ნიკა ცინცაძისა და ლევან ტყეშელაშვილის გაწვრთნილმა გუნდმა დღეს პირველი შეხვედრა კაუნასის ჟალგრისთან დთმო, თუმცა მეორე მატჩში, ნორვეგიულ ბოლერ ოსლოსთან გამარჯვებას მიაღწია – 55:46 (სტატისტიკა).
ჩვენს გუნდში 11 ქულით, 5 მოხსნითა და 3 პასით საუკეთესო იყო გიორგი ნიკოლაევი. 10-10 ქულა ლუკა ტაბაღუამ და ნიკოლოზ კობაიძემ მიითვალეს. საქართველოს ნაკრები 11 მარტს 2 მატჩს გამართავს: ჯერ ადგილობრივ ტარტუს შეხვდება, შემდეგ კი ესტონურსავე რეინარს.
შეგახსენებთ, რომ ესტონეთის საუნივერსიტეტო ქალაქი ტარტუ ევროპის ახალგაზრდული ლიგის, კონკრეტულად კი 2008 წელს დაბადებულთა ტურნირის მესამე წრეს მასპინძლობს. ჩვენმა გუნდმა პირველი წრე გასული წლის 27-30 ოქტომბერს, ლიეტუვის დედაქალაქ ვილნიუსში გამართა, სადაც 5-დან 3 მატჩი მოიგო. წარუმატებელი გამოდგა მეორე წრე, რომელსაც ამა წლის 12-15 იანვარს ლატვიის ქალაქმა ვალმიერამ უმასპინძლა და ნიკა ცინცაძის გაწვრთნილმა ქართველებმა 5-დან 1 მატჩი მოიგეს.
