შენგელიას 16 ქულა და გამარჯვება ბელგრადში

თორნიკე შენგელიას ბრწყინვალე თამაშის წყალობით ესპანურმა “ბასკონიამ” სერბეთსი “ცრვენა ზვეზდას” სძლია. ბასკური კლუბის ქართველმა კაპიტანმა მატჩში საუკეთესო შედეგი დააფიქსირა და ვიტორიელებს დაძაბულ ბრძოლაში – 85:81 მოაგებინა.

შენგელიას 28 წუთში თამაშიდან ტყორცნა არ გაუცუდებია – 6-დან 6 ორქულიანი ჩააგდო, რასაც 5-დან 4 საჯარიმო მიამატა და 16 ქულამდე ავიდა. გარდა ამისა, მის ანგარიშზე 4 მოხსნა და 2 პასია.

ბასკებიდან თორნიკეზე მეტი მხოლოდ გერმანელმა ვოიტმანმა ჩააგდო – 17. მატჩის ბომბარდირი კი მასპინძელი ლესორტი გახდა – 19.

4 მოგებითა და 5 მარცხით “ბასკონია” 16-გუნდიან ევროლიგაში მე-11 ადგილზეა. შემდეგ მატჩს ბასკონიელები 30 ნოემბერს, შინ – “ფენერბაჰჩესთან” ჩაატარებენ.