ევრომასპინძლები: გერმანიამ ლიეტუვა აირჩია, ჩეხეთმა – პოლონეთი

დღეს ფიბა-ს ვებ-გვერდზე ოფიციალურად გამოქვეყნდა, რომ ევრობასკეტ 2022-ის 4 მასპინძლიდან 2-მა – გერმანიამ და ჩეხეთმა პარტნიორი ქვეყნის ფედერაციები დაასახელეს. ეს კი იმას ნიშნავს, რომ არჩეული ქვეყნების ნაკრებები იმ ჯგუფებში იასპარეზებენ, რომლებსაც გერმანია და ჩეხეთი უმასპინძლებენ. 

ასე და ამგვარად, გერმანიამ პარტნიორ ქვეყნად ლიეტუვა აირჩია, ხოლო ჩეხეთმა – პოლონეთი. ეს ამბავი დღეს გამართულ ფიბა-ევროპის აღმასრულებელი საბჭოს (ბორდის) სხდომაზე ოფიციალურად გაჟღერდა. პარტნიორი ფედერაციების არჩევის პრაქტიკა 2015 წლის ევრობასკეტიდან მომდინარეობს და მისი მიზანი ევრობასკეტის ჯგუფური ეტაპის მასპინძელი ქვეყნებისთვის ღონისძიების მარკეტინგული და სპორტული მხარის უკეთესად დაგეგმვა, ასევე მომავალი მეტოქის სიძლიერის მიხედვით შერჩევაა. 

“რა თქმა უნდა, ლიეტუვა, რომელსაც მსოფლიოში ერთ-ერთი ყველაზე ტრადიციული კალათბურთის ფედერაცია ჰყავს – განაცხადა გერმანიის კალათბურთის ფედერაციის პრეზიდენტმა და ფიბა-ს ხაზინადარმა ინგო ვეისმა – საკალათბურთო ენთუზიაზმი ამ ქვეყანაში უდიდესია, ლიეტუველების ფერადი და ხმაურიანი ფანები მთელი მსოფლიოს არენებისთვის კარგად არიან ცნობილნი. ლიეტუვის ფედერაციასთან ჩვენ მრავალწლიანი და მჭიდრო თანამშრომლობა გვაკავშირებს. ამ გამოცდილებამ გვიბიძგა სწორედ იმისკენ, რომ ლიეტუვის ფედერაციასთან გვეთანამშრომლა კიოლნში ჩასატარებელ ჯგუფურ ეტაპზე”.

თავის მხრივ, ლიეტუვის კალათბურთის ფედერაციის პრეზიდენტმა, არვიდას საბონისმაც კეთილგანწყობილი კომენტარი გააკეთა: “მოხარულები ვართ, რომ გერმანიის ფედერაციასთან შეთანხმებას მივაღწიეთ და მოგვეცემა საშუალება, კიოლნში ვიასპარეზოთ. იმედს ვიტოვებ, გულშემატკივრები შეზღუდვების გარეშე დაუბრუნდებიან დარბაზებს და ჩვენს ნაკრებს გერმანიაში სოლიდური მხარდაჭერა ექნება. დარწმუნებული ვარ, თითოეული მატჩი იქნება დიდი ზეიმი მაყურებლებისთვის”.

თავის მხრივ, ჩეხეთისა და პოლონეთის ფედერაციებიც კმაყოფილები არიან მათ შორის შემდგარი თანამშრომლობით. ჩეხეთში ძალიან ბევრი პოლონელი ქომაგი ჩავა, რაც ამ ქვეყნისთვის ტურისტული თვალსაზრისით ძალიან მომგებიანი იქნება.

ზემოთაღნიშნულ პარტნიორობათა შესახებ კომენტარი გააკეთა ფიბა-ევროპის აღმასრულებელმა დირექტორმა, კამილ ნოვაკმა:

“პარტნიორული შეთანხმება, რომელსაც წინა ევროპის ჩემპიონატებზე ჩაეყარა საფუძველი, წარმატებული აღმოჩნდა და ჩვენ მოხარულები ვართ, ეს ტრადიცია კვლავ გავაგრძელოთ. ევრობასკეტის თითოეული მასპინძლისთვის პარტნიორის არჩევის შესაძლებლობის მიცემით ჩვენ იმის გარანტია გვაქვს, რომ ღონისძიებაში გაცილებით მეტი ადამიანი იქნება ჩართული. ჩვენ ვიმედოვნებთ, რომ ბევრ ლიეტუველ ქომაგს ვიხილავთ გერმანიაში და ასევე მრავალი პოლონელი ჩავა ჩეხეთში, რათა თავიანთ ნაკრებებს მხარი დაუჭირონ. ჩვენ ასევე დიდი ენთუზიაზმით ველოდებით დარჩენილი მასპინძლების – საქართველოსა და იტალიის მიერ პარტნიორების დასახელებას”.