FIBA-ს ინტერვიუ სანდრო მამუკელაშვილთან: ევრობასკეტზე საქართველომ უნდა იამაყოს

„სექტემბერში საქართველოს ნაკრები მეხუთედ იასპარეზებს ევრობასკეტზე. ჯგუფის მატჩებს თბილისი უმასპინძლებს და სანდრო მამუკელაშვილს იმედი აქვს, რომ ნაკრების მიერ ნაჩვენები თამაშით გულშემატკივარი გაიხარებს“, – ვკითხულობთ ფიბა-ს ოფიციალურ საიტზე გამოქვეყნებულ ვრცელ სტატიაში, რომელიც მამუკელაშვილს ეძღვნება.

„ფანტასტიკური შანსია. მთელი ქვეყანა ჩვენს გვერდით იქნება. ყოველთვის, როდესაც ნაკრები შინ თამაშობს, დიდ სიყვარულს ვგრძნობთ. ჯგუფური ეტაპის მატჩების შინ გამართვა დიდებული მოვლენაა – გვინდა ჩვენმა ქვეყანამ იამაყოს“, – ამბობს სანდრო მამუკელაშვილი და განაგრძობს:

„გულშემატკივარი ჩვენი მეექვსე მოთამაშეა. ატმოსფერო საოცარი იქნება, არენა ბოლომდე გაივსება და ახმაურდება“.

მიუხედავად იმისა, რომ საქართველო ევრობასკეტის თანამასპინძელია, შესარჩევ ეტაპზე მაინც ითამაშა და 6-დან 4 მატჩი მოიგო. მათ შორის, სერბეთი ბელგრადში დაამარცხა.

„მთავარი ამოცანაა მოვიგოთ რაც შეიძლება მეტი მატჩი და მოვიპოვოთ პლეი ოფის საგზური. ევრობასკეტი რთული შეჯიბრებაა, ყველა კარგი გუნდია და მიზნის მისაღწევად დიდი კონკურენციის დაძლევაა საჭირო.

როდესაც საკუთარ ქვეყანას წარმოადგენ, სუპერმოტივირებული ხარ, მოედანზე მაქსიმუმს დებ. უნდა ვუჩვენოთ, რომ დიდებული ნაკრები გვყავს და შეგვიძლია წარმატებით ვიაროთ მიზნისკენ“.

სანდრო მამუკელაშვილი თინეიჯერი იყო, როდესაც საქართველოს ნაკრებში პირველად ითამაშა. ეს იყო მსოფლიოს 2019 წლის ჩემპიონატის შესარჩევ ეტაპზე.

მას ზაზა ფაჩულიამ პირველმა გაუგზავნა მესიჯი „ფეისბუქზე“, რომლის შემდეგაც სანდრო NBA-ის ორგზის ჩემპიონს დაუახლოვდა.

„ზაზა ჩემი ახლო მეგობარი და მენტორია. უფროსი ძმასავითაა. ძალიან მადლიერი ვარ იმ რჩევებისთვის, რასაც ფაჩულია ბოლო წლებია, მაძლევს. მასთან შეხვედრა საოცარი მომენტი იყო. არასოდეს დამავიწყდება. ის ქართული კალათბურთის ლეგენდა და უამრავი კალათბურთელის ინსპირაციის წყაროა.

საქართველოსთვის NBA-ში კალათბურთელის ყოლა, საოცარი ამბავია. ზაზა პატივსაცემი პიროვნებაა და ბევრ კალათბურთელს ეხმარება ოცნებების ახდენაში“.

მამუკელაშვილმა „მილუოკი ბაქსის“ მაისურით სეზონი ეფექტური მატჩით დაასრულა: 28 ქულა და 13 მოხსნა მოაგროვა. მამუს გარდა ამერიკაში მაღალ დონეზე თამაშობენ გოგა ბითაძე და გიორგი ბეჟანიშვილი.

ახალგაზრდა ტალანტების გამოცდილ კალათბურთელებთან (გიორგი შერმადინი, თორნიკე შენგელია) შერწყმა გულშემატკივარს ოპტიმიზმის საფუძველს აძლევს.

„კარგი, ტანამღალი შემადგენლობა გვყავს. საქართველოს ნაკრები ძლიერი გუნდია, რომელმაც უმაღლეს დონეზე უნდა გაიბრწყინოს. მრავალმხრივი თამაში შეგვიძლია: გვყავს მაღლები და შეგვიძლია ფარქვეშ უპირატესობის მოპოვება, ასევე შეგვიძლია საშუალო და შორი დისტანციიდან ტყორცნა. ასეთი იარაღის ქონა ყოველთვის საინტერესოა, მაგრამ ჩვენი მთავარი სიძლიერე ის არის, რომ საქართველოს ნაკრების მაისური გვეცმევა. ასეთ დროს ლიმიტი არ არსებობს. 120 პროცენტით უნდა დაიხარჯო, რომ დანარჩენებისთვის კარგი თანაგუნდელი იყო. ჩვენ მთელი ქვეყნისთვის ვთამაშობთ.

გამოცდილი და ახალგაზრდა კალათბურთელების კარგი ნაზავი გვყავს. გამოცდილებისგან ძალიან ბევრს ვისწავლით“.

საქართველოს ნაკრებს ივლისში მსოფლიო ჩემპიონატის შესარჩევი მატჩი ელის ესპანეთთან. ამავე გუნდს სექტემბერში ევრობასკეტზეც შეხვდება:

„ევროპის ჩემპიონატზე საინტერესო ჯგუფში მოვხვდით. ყველა გუნდს აქვს პელი ოფში გასვლის შესაძლებლობა. ყველა ბოლომდე იბრძოლებს. ესპანეთი ძალიან ძლიერია. მიუხედავად იმისა, რომ ამ ქვეყნის ნაკრებიდან ბევრი ვეტერანი ვარსკვლავი წავიდა, მაინც კარგი გუნდია“.