საქართველოს საკალათბურთო სუპერლიგის 2026-2027 წლების სეზონის სადებიუტო ტური კვირას გამართული ორი შეხვედრით დასრულდა, სადაც „კსუ კავკასიამ“ შთამბეჭდავი უპირატესობით სძლია მეტოქეს, ხოლო „ორბმა“ კახეთში მნიშვნელოვანი გასვლითი გამარჯვება მოიპოვა.
დიღმის არენაზე გამართული შეხვედრა „კსუ კავკასიას“ სრული დომინირებით წარიმართა — ბექა წივწივაძის გაწვრთნილმა გუნდმა ოთხივე მეოთხედი დამაჯერებლად ჩაატარა და „ბლექ ფორტრესი“ 24-ქულიანი სხვაობით, 108:84 (სტატისტიკა) დაამარცხა. „კავკასიელებმა“ განსაკუთრებით ეფექტურად ითამაშეს შეტევაში, სადაც გუნდურმა სრულყოფილებამ და სათადარიგო სკამის სიღრმემ (58 ქულა სათადარიგოებიდან) მატჩის ბედი ადრეულ ეტაპზევე გადაწყვიტა. გამარჯვებულთა შემადგენლობაში საუკეთესოები ალექსანდრე ვაშაკიძე (19 ქულა), აკაკი დვალიშვილი (18 ქულა), სანდრო სანაძე (15 ქულა), შამარ რაითი (15 ქულა) და ტომი ლუისი (13 ქულა, 7 პასი) იყვნენ, ხოლო „ბლექ ფორტრესიდან“ ვახტანგ გაფრინდაშვილი (19 ქულა), დონდრე რედიკი (12 ქულა, 4 ჩაჭრა), ლევან გოგალაძე (12 ქულა) და გიორგი რუხაძე (10 ქულა) გამოირჩნენ.
ტურის დასკვნითი მატჩი თელავში შედგა, სადაც ადგილობრივმა გუნდმა პირველი ტაიმი კარგად ჩაატარა და შესვენებაზე 6-ქულიანი ლიდერობით გავლით იმედი გაიჩინა, თუმცა „ორბმა“ მესამე პერიოდში თამაშის გარდატეხა შეძლო და 87:81 (სტატისტიკა) იმარჯვა. სტუმართა წარმატების მთავარი შემოქმედი ორმაგი დუბლის ავტორი ალექს მეთიუსი (22 ქულა, 11 მოხსნა, 7 პასი) გახდა, რომელსაც მხარი ჰენრი ვეტერიმ (14 ქულა), ჯიმი ბელიმ (13 ქულა, 17 მოხსნა) და კევონ ვესტიმ (13 ქულა) აუბეს, ხოლო „თელავიდან“ გიორგი კობახიძემ (19 ქულა, 6 მოხსნა), ნიკოლოზ დარბაიძემ (16 ქულა), კაილერ ვანდერ ჯაგტმა (15 ქულა) და ვატო გაჩეჩილაძემ (14 ქულა) ითამაშეს შედეგიანად.
სუპერლიგის მეორე ტურში, სადაც „ორბი“ ისვენებს, 9 ოქტომბერს „კსუ კავკასია“ „ქუთაისს“ (14:00) უმასპინძლებს, ხოლო „რუსთავი“ „თელავს“ (19:30) შეხვდება; 10 ოქტომბერს „ახალციხე“ „ბათუმს“ (15:00) დაუპირისპირდება, ხოლო „ბლექ ფორტრესი“ „ივერიონს“ (18:00) მიიღებს, ტური კი 11 ოქტომბერს, „მარგვეთისა“ და თსუ-ს (14:30) მატჩით დაგვირგვინდება.
