საქართველომ ევრობასკეტის მეორე მატჩი იტალიასთან დათმო

ესპანეთის დამარცხების შემდეგ, საქართველოს ნაკრებმა ევრობასკეტზე მეორე შეხვედრა კიდევ ერთ გრანდთან, იტალიასთან გამართა და მარცხი განიცადა. კარგად ჩატარებული პირველი ტაიმისა და კიდევ უფრო კარგი მესამე პერიოდის საწყისი წუთების შემდეგ, საქართველოს ნაკრები აირია, თამაშის სადავეები ხელიდან გაექცა და საბოლოოდ 16 ქულით – 62:78 (სტატისტიკა) დამარცხდა.

არადა, ალექსანდარ ჯიკიჩის გუნდმა 10-ქულიანი ჩამორჩენა აღმოფხვრა და დიდ შესვენებაზე მეტოქესთან თანაბრად გავიდა. მესამე პერიოდში გოგა ბითაძის დაცვითმა თამაშმა და წარმატებით დაგვირგვინებულმა შეტევებმა 4 ქულით – 41:37 გაგვალიდერა და შეტევაც ჩვენი იყო, თუმცა მოხდა გაურკვევეი რამ. ისე, თითქოს სათამაშო უპირატესობას არ ფლობდნენ, იტალიელებმა გაქცევა მოაწყვეს. სიმონე პონტეკიოსა და დარიუს ტომპსონის მექულეობით იტალიამ 11:0 გაქცევა მოაწყო და 48:41 დაწინაურდა.

წუთშესვენებისა და დაცვის გამოსწორების შემდეგ საქართველოს ნაკრებმა ჩამორჩენა 6 ქულამდე შეამცირა და ბოლო პერიოდის წინ შანსი მოიპოვა. თამაშზე გავლენა მსაჯებმაც იქონიეს. იტალიელთა გაუთავებელი უხეშობის ფონზე თორნიკე შენგელიას ნერვებმა უმტყუნა და 2 ტექნიკური ჯარიმის გამო მოედანი დისკვალიფიკაციის გამო დატოვა. დასრულებამდე 7 წუთით ადრე 5 პერსონალურის გამო მოედნიდან სანდრო მამუკელაშვილი გავიდა. 

“მაქსიმალურად კორექტულად ვიტყვი, ეს ჩემი საქმე არაა, მაგრამ ვისურვებდი, რომ მსაჯობა უკეთესი ყოფილიყო” – განაცხადა მატჩის შემდეგ პრესკონფერენციაზე ბექა ბურჯანაძემ და ძნელია, არ დაეთანხმო. 

 “ორი განსხვავებული ტაიმი ვითამაშეთ. პირველი ტაიმი 32:32 დასრულდა. მეორე ტაიმში ბევრს ვეცადეთ, მართლა ბევრს ვეცადეთ მიზნის მისაღწევად. სიმართლე გითხრათ, ცოტა დაბნეული ვარ ჩვენი ლიდერის მიმართ მოპყრობით, მაგრამ ვფიქრობ, ჩემი საქმე არ არის ამაზე საუბარი. ჩვენ ვიცით, რა მიზანი გვაქვს. ორი ტურის შემდეგ ერთი მოგება და ერთი მარცხი გვაქვს. ბოლომდე ვიბრძოლებთ და ყველაფერს გავაკეთებთ.” – ეს უკვე ალეკსანდარ ჯიკიჩის სიტყვებია.

საქართველოს ნაკრებში 22 ქულით, 4 მოხსნითა და 3 დაფარებით საუკეთესო იყო გოგა ბითაძე. 13 ქულა, 5 მოხსნა და 3 პასი სანდრო მამუკელაშვილმა მოაგროვა. კამარ ბოლდუინის ანგარიშზე 9 ქულა დაგროვდა, დუდა სანაძემ 8 ქულა მიითვალა. 

საქართველოს ნაკრების მესამე მეტოქე საბერძნეთის ნაკრებია, რომელმაც დღეს 96:69 გაანადგურა კვიპროსი. დღეს გვიან ღამით დასრულდება ჩვენი ჯგუფის პრინციპული მატჩი ბოსნია ესპანეთის წინააღმდეგ. საქართველოსა და საბერძნეთის მატჩი 31 აგვისტოს, თბილისის დროით 16:00 საათზე დაიწყება.