რუსთავმა გრიფინს მეორედაც დამაჯერებლად სძლია და სუპერლიგაში დარჩენის ზღვარზეა

საკვალიფიკაციო სერია სუპერლიგის ბოლო საგზურისთვის გრძელდება და რუსთავმაც მეორე მძლავრი ნაბიჯი გადადგა ელიტაში ადგილის შესანარჩუნებლად. ქვემოქართლური გუნდი, რომელმაც რეგულარული ჩემპიონატი მეათე პოზიციაზე დაასრულა, კასპის “გრიფინს” მასპინძლობს. “ა” ლიგის ფინალისტისთვის ეს ელიტაში მოხვედრის დამატებითი შანსია, თუმცა სერიის სტარტზე ძალთა ბალანსი აშკარად ქვემოქართლელთა მხარესაა. შეხვედრა რუსთაველთა სრული დომინაციით წარიმართა და საბოლოოდ მათივე გამარჯვებით, 93:62 (სტატისტიკა) დასრულდა.

მატჩის სცენარი პირველივე წუთებიდან გამოიკვეთა. რუსთავმა საწყის პერიოდშივე მოიპოვა სოლიდური უპირატესობა და ათწუთეული 28:16 მოიგო. სტუმრებმა მეორე პერიოდში თამაშის გათანაბრება სცადეს, თუმცა მასპინძლებმა ტემპი არ დააგდეს და დიდ შესვენებაზე უკვე 21-ქულიანი ჰანდიკაპით გავიდნენ. მესამე პერიოდი გარდამტეხი აღმოჩნდა, როდესაც რუსთავის დაცვამ კასპელებს მხოლოდ 10 ქულის ჩაგდების საშუალება მისცა, თავად კი სხვაობა სოლიდურ ნიშნულამდე გაზარდა. დასკვნით მეოთხედში მოედანზე სურათი აღარ შეცვლილა და რუსთავმა მატჩი მშვიდად მიიყვანა გამარჯვებამდე.

გამარჯვებულთა მხრიდან საუკეთესო შედეგი მონტეს მატისმა აჩვენა, რომელმაც 21 ქულა დააგროვა. მას მხარი აუბეს გუგა პატაშურმა 19 ქულითა და 10 მოხსნით და ვახტანგ ქადარიამ, რომელმაც აქტივში 10 ქულა ჩაიწერა. კასპის “გრიფინის” შემადგენლობაში ყველაზე შედეგიანები ალექს მეთიუსი (15 ქულა) და დავით კობიაშვილი (9 ქულა) იყვნენ.

ამ გამარჯვებით რუსთავი სერიაში 2:0 დაწინაურდა. მომდევნო შეხვედრა 27 აპრილს კასპში გაიმართება. იმ შემთხვევაში, თუ რუსთაველები სტუმრადაც მოიგებენ, სერია 3:0 დასრულდება, რაც იმას ნიშნავს, რომ ქვემოქართლური კლუბი სუპერლიგაში ადგილს ოფიციალურად შეინარჩუნებს.