სანაძის 15 ქულა და ბორაცის გამარჯვება სპლიტში

ქალაქ ჩაჩაკის კლუბმა “ბორაცმა”, რომლის ღირსებასაც დუდა სანაძე იცავს, ადრიატიკის ლიგაზე მნიშვნელოვანი გამარჯვება მოიპოვა. ბოლოსწინა ადგილზე მყოფი ბორაცელები ხორვატიაში უშუალო კონკურენტ “სპლიტს” შეხვდნენ, რომელსაც მათზე 1 გამარჯვებით მეტი ჰქონდა მოპოვებული. შეხვედრა სერბულმა გუნდმა 86:74 მოიგო, რაშიც სანაძეს სოლიდური წვლილი მიუძღვის.

ქართველი მსროლელი სასტარტო ხუთეულში იყო და მოედანზე 24 წუთი გაატარა. ბორაცელთა ბომბარდირი ნოვაკოვიჩი გახდა 21 ქულით, რის შემდეგაც საუკეთესო შედეგი სანაძეს ჰქონდა. ქართველმა ლეგიონერმა 6-დან 3 ორქულიანი, 5-დან 2 სამიანი და 3-დან 3 საჯარიმო ჩააგდო, 15 ქულას უწია და ამას 2 პასი და 1 ჩაჭრაც მოაყოლა. 

8 გამარჯვებითა და 17 მარცხით ბორაცი მე-10 ადგილზეა და რეგულარული ჩემპიონატის ბოლო, 26-ე ტურში ხორვატულ “ციბონას” უმასპინძლებს.