სანიკიძის გუნდს სიენაში გამარჯვებამდე ცოტა დააკლდა

ვიქტორ სანიკიძის „კანადიან სოლარმა“ მეოთხედფინალური სერიის მეორე მატჩში დიდი წინააღმდეგობა გაუწია ფავორიტ „სიენას“, თუმცა საბოლოოდ მხოლოდ ის მოახერხა, რომ 4 ქულით დამარცხდა – 81:85. თუკი გავითვალისწინებთ, რომ ბოლონიელებმა სერიის პირველი შეხვედრა 39 ქულით წააგეს, წუხანდელი მატჩი მათ კარგად ჩაატარეს, მაგრამ წაგება წაგებაა და სანიკიძის გუნდი სერიაში 0:2 ჩამორჩა.
 
ქართველი ლეგიონერი ბოლონიელთა გუნდის ხუთეულში იყო და მოედანზე 30 წუთი გაატარა. სანიკიძე შეტევით ნაკლებად იყო დაკავებული და ძირითადად დაცვაში ირჯებოდა. ვიქტორმა სიენელთა კალათს მხოლოდ სამჯერ შეუტია, საიდანაც 2 სროლა ჩააგდო: 2–დან 1 ორქულიანი და 1–დან 1 სამიანი, რამაც მთლიანობაში 5 ქულა შეადგინა.
 
სანიკიძე ფარქვეშა ბრძოლებში საკმაოდ აქტიური იყო და საბოლოოდ 11 მოხსნა მოაგროვა, რასაც 1 პასი და 1 დაფარება მოაყოლა. ქართველი ლეგიონერი თავისიანთაგან ერთ–ერთი საუკეთესო იყო, თუმც საბოლოო წარმატების მისაღწევად ბოლონიელებს ცოტა დააკლდათ.
 
„სიენა“ სერიას 2:0 იგებს და საბოლოო წარმატებისთვის 1 გამარჯვებაღა აკლია. მომდევნო მატჩი ხვალ, 23 მაისს, ბოლონიაში გაიმართება.
 

ვიქტორ სანიკიძე სიენელი შონ სტოუნრუკის დაფარებას ცდილობს