სუპერლიგის მე-3 ტური მარგვეთის, თსუ-ს და ორბის გამარჯვებებით გაგრძელდა

გუშინ, გურჯაანში დაწყებული სუპერლიგის მე-3 ტური დღეს თბილისსა და გორში გაგრძელდა. თბილისი არენაზე გასამართი 2 შეხვედრიდან პირველში “რაში” და ზესტაფონის “მარგვეთი” შეხვდნენ. არც ერთ გუნდს მიმდინარე სუპერლიგაში გამარჯვება არ ჰქონდა და საინტერესო იყო, რომელი მათგანი გატეხდა უიღბლო ნავსს.

ეს საბოლოოდ ზესტაფონელებმა მოახერხეს, რომლებმაც ჩინებული ბოლო პერიოდი ჩაატარეს და დამსახურებულად – 79:66 (სტატისტიკა) გაიმარჯვეს. “რაშისთვის” ეს აღმოჩნდა მე-3 მარცხი, რითაც მამუკა ტურაშვილის გაწვრთნილ გუნდს სუპერლიგაში გურჯაანის “დელტასთან” ერთად ყველაზე უარესი შედეგი აქვს. 

“მარგვეთში” ჩინებული მატჩი ჰქონდა 19 წლის ლუკა კოტლიარევსკის, რომელმაც 10 ქულა, 3 მოხსნა და 3 პასი ჰქონდა. ბომბარდირი სანდრო სანაძე გახდა 16 ქულით, ხოლო ყველაზე შედეგიანი – კრისტიან ჯონსი – 8 ქულა, 7 ჩაჭრა, 6 პასი და 5 მოხსნა. ზესტაფონელებს 2 მარცხის წინ 1 მოგება აქვთ.

მომდევნო მატჩში საკმაოდ დაძაბული ბრძოლა ვიხილეთ, რომლის ბედიც ბოლო წამებზე გადაწყდა. არადა, თსუ კომფორტულად უგებდა “ა” ლიგიდან” ამოსულ “რუსთავს”, რომელიც არ დანებდა, ლეგიონერთა და ქართველების შეუპოვარი ბრძოლის ხარჯზე 15-ქულიანი ჩამორჩენა მაქსიმალურად შეკვეცა და ბოლო წუთზე მეტოქეს ქულით მიუახლოვდა. თსუ-ში დომინანტურად ითამაშა გიორგი ტურძილაძემ, რომელსაც მხარს თანაგუნდელებიც უბამდნენ და საბოლოოდ უნივერსიტეტელებმა მოახერხეს გამარჯვება – 84:80 (სტატისტიკა).

თსუ-ში 20 ქულით, 11 მოხსნითა და 3 დაფარებით საუკეთესო იყო გიორგი ტურძილაძე. 21 ქულა და 6 მოხსნა ჰქონდა კურვოსიე მაკკოლის, ალექსანდრე ფევაძემ 8 ქულა და 12 მოხსნა მოაგროვა. რუსთაველთაგან 18 ქულით, 11 მოხსნითა და 5 პასით ელაია ბიუქენენი გამოირჩა. 17 ქულა და 6 მოხსნა გუგა პატაშურის ანგარიშზეა.

დაბოლოს, გორში ჩატარებულ მატჩზე. რეგიონალურ დერბიში “ივერიონმა” ტყიბულის “ორბს” უმასპინძლა და დაძაბულ ბრძოლაში – 85:90 (სტატისტიკა) დამარცხდა. ტყიბულელთა გამწევ ძალას 2 მური წარმოადგენს. თომას და შონ მურებმა ორბს ულიდერეს და გამარჯვება მოაპოვებინეს. პირველმა (თომასმა) 22 ქულა, 9 პასი და 7 მოხსნა მოაგროვა, ხოლო შონ მურის ანგარიშზე 16 ქულა და ამდენივე მოხსნაა.

სუპერლიგის მე-3 ტური კვირას, ბათუმში დასრულდება, სადაც სათამაშოდ კსუ-კავკასია ჩადის.