საქართველოს 16-წლამდელთა ნაკრები ევროპის ახალგაზრდული ლიგის სუპერფინალის სათამაშოდ ლიეტუვის დედაქალაქ ვილნიუსში გაემგზავრა, სადაც მთლიანობაში 10 გუნდი იასპარეზებს. ირაკლი ჩერქეზიშვილისა და მისი ასისტენტის, დიმიტრი ჯაკობოვის გაწვრთნილი ჩვენი გუნდი 13 და 14 მაისს 4 შეხვედრას გამართავს და წარმატების შემთხვევაში პლეი ოფში გავა.
ჩვენი ნაკრები ვილნიუსში ამ შემადგენლობით გაემგზავრა:
იოსებ გუგუციძე, ბაჩანა შველიძე, ალექსანდრე მგელაძე, ლუკა მუჯირიშვილი, გურამ ცხადაძე, ნიკოლოზ ფუტურიძე, ივიკო ნემსაძე, გოგიტა ბუკია, ალექსანდრე დაუშვილი, ვაჟა კეჭაყმაძე, ლუკა ბარბაქაძე, ნიკოლოზ გურგენიძე, ნიკოლოზ აბულაძე.
საქართველოს ნაკრებმა ევროპის ლიგის რეგულარულ ჩემპიონატის 2 წრის ჯამში 10 მატჩი გამართა, საიდანაც 7 მოიგო და 3 წააგო. ჩვენი ნაკრები ევროპის სხვა წამყვან გუნდებთან ერთად სუპერფინალზე სათამაშოდ მიიწვიეს, რომლის გამარჯვებულიც 15 მაისს გამოვლინდება. საქართველოსთან ჯგუფში მოხვდნენ ადგილობრივი გუნდები – ვილნიუს KM და ვილნიუს KM-2005.
საქართველოს 16-წლამდელთა ნაკრებმა ჯგუფში პირველი მატჩი დამაჯერებლად მოიგო. ჩერქეზიშვილ-ჯაკობოვის გუნდის მეტოქე იყო ვილნიუს KM-2005, რომელსაც საქართველომ 76:53 (სტატისტიკა) სძლია. ჩვენს გუნდში 20 ქულით და 5-5 მოხსნა-ჩაჭრით საუკეთესო შედეგი გოგიტა ბუკიამ დააფიქსირა. 13 ქულა ნიკოლოზ აბულაძემ, ხოლო 12 – ნიკოლოზ გურგენიძემ მიითვალეს.
დღეს, 13 მაისს, საქართველო მეორე მატჩს 19:30 საათზე გამართავს ბულგარულ “ბუბასთან”, ხოლო 14 მაისს საქართველო “ვილნიუს KM”-ს და ლატვიურ “ლიეპაიას” დაუპირისპირდებიან.
