ბოლონიური “ვირტუსი” იტალიის სერია “ა”-ს ფინალურ სერიაში ისევ ჩამორჩა. თორნიკე შენგელიას გუნდმა სერიიც მორიგი მატჩი მილანში გამართა, სადაც მასპინძელმა “არმანი იქსჩეინჯმა” 94:82 იმარჯვა და სერიაში ანგარიში 2:1 გახდა.
საქართველოს ეროვნული ნაკრების კაპიტანი ტრადიციულად ბოლონიელთა სასტარტო ხუთეულში გამოჩნდა და 28 წუთში (ყველაზე მეტი დრო სტუმართა რიგებში) 10 ქულა, 3 მოხსნა, 1 დაფარება, 1 ჩაჭრა და 2 პასი მიითვალა.
თორნიკემ 7-დან 4 ორქულიანი და 2-ვე საჯარიმო ჩააგდო, 1 სამქულიანი ააცილა, ერთხელ დაუფარეს, ბურთი 3-ჯერ დაკარგა, 4 პერსონალური ფოლი მიიღო, მის წინააღმდეგ კი 3-ჯერ დაჯარიმდნენ.
სტუმართა რიგებში საუკეთესო დანიელ ჰეკეტი (18 ქულა, 6 მოხსნა, 5 პასი) იყო, ხოლო მილანელებს ნიკოლო მელიმა (22 ქულა) და შევონ შილდსმა (19 ქულა, 7 მოხსნა) ულიდერეს.
სერია A-ს ფინალური სერია ოთხ მოგებამდე გრძელდება, მომდევნო შეხვედრა კი 14 ივნისს ისევ მილანში შედგება.
