შერმადინის 19 ქულა და ტენერიფეს ზედიზედ მე-7 გამარჯვება ჩემპიონთა ლიგაში

ფიბა-ს ჩემპიონთა ლიგის ჯგუფური ეტაპის მე-7 ტურში გიორგი შერმადინის იბეროსტარ ტენერიფემ გერმანული ბამბერგი 82:64 დაამარცხა. ქართველი ცენტრი ესპანური კლუბის სასტარტო ხუთეულში იყო. 24 წუთში მან 19 ქულა დააგროვა. თამაშიდან 67%-იანი სიზუსტით ისროდა, ხოლო საჯარიმოს ხაზიდან – უნაკლოდ. გამარჯვებულთა რიგებში ყველაზე მეტი ქულა სწორედ შერმადინს ჰქონდა.

ქართველი ცენტრის ანგარიშზეა 5 მოხსნა და 1 ჩაჭრა, პასივში – 4 დაკარგვა და 1 პერსონალური ჯარიმა. მარგი ქმედების კოეფიციენტით (17) შერმადინი გუნდში მხოლოდ მარსელინიო უერტასს (20) ჩამორჩა. 

C ჯგუფში პირველი წრე დასრულდა და შერმადინის გუნდი 7-დან 7 მოგებით ლიდერია. პლეი ოფში 4 საუკეთესო გადის. 10 დეკემბერს ტენერიფე ნიჟნი ნოვგოროდს ესტუმრება.