თურქეთის საკალათბურთო სუპერ ლიგის 28-ე ტურში მარკის რიდის „ტრაბზონსპორმა“ სტამბოლის „გალათასარაი“ 79:69 დაამარცხა, რაშიც გადამწყვეტი წვლილი საქართველოს ნაკრების ახალწვეულმა შეიტანა.
რიდი მოედანზე 33:37 წუთის განმავლობაში იმყოფებოდა და სამმაგ დუბლამდე სულ ცოტა დააკლდა — მან 17 ქულა, 12 შედეგიანი გადაცემა და 6 მოხსნა დააგროვა. ქულებით, პასებითა და 5 ჩაჭრით ის შეხვედრაში საუკეთესო იყო, ხოლო მოხსნების რაოდენობით საკუთარ გუნდში ლიდერობდა. მიუხედავად იმისა, რომ კალათბურთელმა 5-ჯერ დაკარგა ბურთი და ვერცერთი სამქულიანი ვერ გამოიყენა, მისი მარგი ქმედების კოეფიციენტი 26-ს გაუტოლდა, რაც მატჩში საუკეთესო მაჩვენებელი აღმოჩნდა და რიდმა კიდევ ერთხელ დაიმსახურა MVP-ის ტიტული.
მიმდინარე სეზონში რიდი საშუალოდ 23.4 ქულას, 5.3 პასსა და 3.6 მოხსნას აგროვებს, რითაც ის თურქეთის ჩემპიონატში პირველ ადგილზეა როგორც ქულების, ისე ეფექტურობის მიხედვით. ამ გამარჯვებით „ტრაბზონსპორმა“ 18-10 ბალანსით მე-6 ადგილი გაიმყარა, „გალათასარაისთან“ უპირატესობა ორ მოგებამდე გაზარდა და პლეი ოფში თამაშიც ოფიციალურად გაინაღდა, მომდევნო შეხვედრას კი მარკის რიდის გუნდი 3 მაისს, სტუმრად „ტურკ ტელეკომის“ წინააღმდეგ გამართავს.
სანდრო მამუკელაშვილის „ტორონტო რეპტორსმა“ საკუთარ მოედანზე ზედიზედ მეორე გამარჯვება მოიპოვა „კლივლენდ კავალიერსის“ წინააღმდეგ (93:89). ამ წარმატების შედეგად, აღმოსავლეთ კონფერენციის მეოთხედფინალურ სერიაში წონასწორობა აღდგა და ანგარიში გათანაბრდა.
აღსანიშნავია, რომ კანადურმა გუნდმა საკმაოდ დაბალი პროცენტული მაჩვენებლებით იასპარეზა: 97 მცდელობიდან მხოლოდ 31 ტყორცნა გამოიყენეს, ხოლო 30-დან მხოლოდ 4 სამქულიანი ჩააგდეს. მიუხედავად ასეთი სტატისტიკისა, მასპინძლებმა მოგება მაინც შეძლეს, რადგან დაკარგვებსა და არაზუსტ სროლებში არც ოპონენტი ჩამორჩათ.
ქართველმა ფორვარდმა პმოედანზე 13 წუთი დაჰყო. ამ დროში მამუკელაშვილმა ფორვარდმა 2 ქულა, 8 მოხსნა (აქედან 3 მეტოქის ფარზე), 1 პასი, 2 ჩაჭრა და 1 დაფარება მიითვალა. სანდრომ ორიდან ერთი ორქულიანი გამოიყენა, ერთი სამქულიანი კი ააცილა. მან მატჩი დაკარგვის გარეშე და ერთი პერსონალური ფოლით დაასრულა, მისი თამაშის დროს კი „რეპტორსმა“ მეტოქესთან შედარებით 6-ქულიანი უპირატესობა მოიპოვა.
გამარჯვებულთა მხრიდან საუკეთესო შედეგი ბრენდონ ინგრემმა და სკოტი ბარნსმა აჩვენეს — მათ 23-23 ქულა დააგროვეს. არ ჯეი ბარეტმა გუნდს 18 ქულა შესძინა, ხოლო კოლინ მარი-ბოილსმა ორმაგი დუბლით (15 ქულა, 10 მოხსნა) გამოიჩინა თავი. რაც შეეხება „კლივლენდს“, დონოვან მიტჩელმა 20 ქულა მოაგროვა, რომელთა უმეტესობაც ბოლო პერიოდზე მოდის, თუმცა გადამწყვეტ მომენტში სიზუსტე დააკლდა. ჯეიმს ჰარდენის ანგარიშზე 19 ქულა და 8 შედეგიანი გადაცემაა, თუმცა მის თამაშს 7 დაკარგვამ დაასვა დაღი.
სერია ახლა კლივლენდში ბრუნდება. 29 აპრილის ღამეს „ტორონტო“ სტუმრად ეცდება, მიმდინარე დაპირისპირებაში პირველი გასვლითი გამარჯვება მოიპოვოს.
თორნიკე შენგელიას ბრწყინვალე თამაში ყოფილი გუნდის წინააღმდეგ და „ბარსელონას“ რთული გამარჯვება
ესპანეთის ჩემპიონატის (ლიგა ენდესა) 28-ე ტურის ცენტრალური შეხვედრა „ბარსელონასა“ და „ბასკონიას“ შორის თორნიკე შენგელიას ბენეფისად იქცა. კატალონიურმა გრანდმა დაძაბულ ბრძოლაში, 95:92 სძლია ვიტორიელებს, მატჩის ბედი კი ბოლო წუთებზე გადაწყდა — მეოთხე პერიოდში მოპოვებული 4-ქულიანი უპირატესობა „ბარსასთვის“ გამარჯვების მომტანი აღმოჩნდა.
საქართველოს ნაკრების კაპიტანი მოედანზე ერთ-ერთი საუკეთესო იყო. შენგელიამ ყოფილი გუნდის წინააღმდეგ, რომელთან ერთადაც ადრე ესპანეთის ჩემპიონობა იზეიმა, 30 წუთი ითამაშა. ამ დროში მან 20 ქულა, 6 მოხსნა და 2 შედეგიანი გადაცემა მიითვალა. თორნიკე განსაკუთრებით დამაჯერებელი იყო საშუალო დისტანციიდან (8/12 ორქულიანი) და საჯარიმოს ხაზიდან (4/6), სამქულიანი კი საერთოდ არ უსვრია. მისი მარგი ქმედების კოეფიციენტმა 26-ს მიაღწია.
ლიგა ენდესამ ქართველი ფორვარდის თამაში ერთი სიტყვით შეაფასა — „განუზომელი“, რაც ხაზს უსვამს მის გადამწყვეტ როლს მატჩის კულმინაციურ მომენტში. შედეგიანობით შენგელიას მხოლოდ მეტოქე გუნდის წევრმა, კობი სიმონსმა გადაასწრო (25 ქულა, მარგი ქმედება 27). რაც შეეხება „ბასკონიას“ ქართველ ახალგაზრდას, მათე ხატიაშვილს, ამჯერად მას სათამაშო დრო არ მისცემია.
