3x3Geotour2024 თბილისის შესარჩევი ტურით გაიხსნა

საქართველოს ჩემპიონატი 3×3 კალათბურთში, რომელიც Geotour-ის სახელით არის ცნობილი, 30 ივლისს, თბილისის შესარჩევი ტურით გაიხსნა. შეგახსენებთ, რომ აღნიშნული ტურნირი 2014 წლიდან ტარდება საქართველოს მასშტაბით და სხვადასხვა ქალაქებში ჩატარებული შესარჩევი ტურნირების შემდეგ დასკვნითი, ფინალური ტურნირის შედეგად ავლენს საქართველოს ჩემპიონს.

წლევანდელი საპრიზო ფონდი რეკორდულია და გამარჯვებულისთვის 4000, ხოლო ფინალისტისთვის 2000 ლარს შეადგენს. აღნიშნული თანხის შესაბამის ვაუჩერებს მიიღებენ ფინალური ტურნირის ფინალში გასული გუნდები. 

ბოლო წლებში დამკვიდრებული ტრადიციით შესარჩევი ტურები 4 ქალაქში – თბილისში, ბათუმში, თელავსა და რუსთავში ტარდება. ამ 4 ტურიდან ფინალური ტურნირისთვის, რომელსაც დედაქალაქი უმასპინძლებს, შეირჩევა 12 საუკეთესო გუნდი, რომლებიც ზემოთ ნახსენები ბონუსებისა და ქვეყნის უძლიერესი გუნდის სტატუსისთვის იბრძოლებენ.

თბილისის შესარჩევ ტურნირში ფინალური ეტაპის ყველაზე მეტი – 8 საგზური თამაშდება, ხოლო დანარჩენი 3 ქალაქიდან ფინალში მხოლოდ გამარჯვებული გუნდები გადავლენ. ლისის ტბაზე გამართული თბილისის შესარჩევი ტურნირის 8 საუკეთესო გუნდმა – WINGS, NIHAU, SCOOBY, THE BOYS, ACAB, BIODRONE, ALMEDA, SMN – ფინალური ეტაპის საგზურები მოიპოვა. 

გარდა იმისა, რომ საგზურები მოიპოვეს, თბილისის ტურის მონაწილეებმა გამარჯვებულიც გამოავლინეს, რისთვისაც დიდი ბრძოლები გაიმართა. დებულებით, გუნდს განაცხადში შეუძლია სუპერლიგის გასული სეზონის 2 მოთამაშე ჰყავდეს. ეს ლიმიტი რამდენიმე გუნდ ჰქონდა შევსებული, რომელთაგან ერთ-ერთი გახლდათ NIHAU, სადაც ეროვნული ნაკრების მოქმედი წევრი, (ლუკა მაზიაშვილი)  კანდიდატები (დათა კაკუშაძე, ნიკა დარბაიძე) და A ლიგის კალათბურთელი (საბა გეგუჩაძე) თამაშობდნენ. 

NIHAU ფინალში გავიდა, სადაც სხვადასხვა ასაკობრივი ჩემპიონატების მოთამაშეებით დაკომპლექტებულ გუნდ WINGS-ს (ლუკა ხარაბაძე, ირაკლი ახალაია, ვაჩე ფარულავა, ნიკა წითელაური) შეხვდა. ძალიან დაძაბული ფინალური მატჩის ძირითად დროში გამარჯვებული ვერ გამოვლინდა. ოვერტაიმში გადასული შეხვედრა ირაკლი ახალაიას შორეული სროლით WINGS-მა მოიგო და თბილისირუ ტურის ჩემპიონი გახდა.

მომდევნო შესარჩევი ტური ბათუმში, 2 აგვისტოს (უამინდობის შემთხვევაში 3 აგვისტოს) გაიმართება, საიდანაც ფინალური ეტაპის საგზურს გამარჯვებული მოიპოვებს.