საქართველოს 20-წლამდელთა ნაკრებმა ესტონეთი დაამარცხა

საქართველოს 20-წლამდელთა საკალათბურთო ნაკრებმა ევროპის ჩემპიონატის B დივიზიონში პირველი გამარჯვება მოიპოვა. სამწუხაროდ, ეს ჯგუფური ეტაპის ბოლო ტურში, 3 წაგების შემდეგ მოხდა, რომლებიც ჩვენებმა უკრაინასთან, შვეიცარიასთან და ლუქსემბურგთან განიცადეს. საქართველომ ამ გამარჯვებით თავი დააღწია ჯგუფში ბოლო ადგილს, მე-5 პოზიციაზე გავიდა და ახლა ასპარეზობას 13-16 ადგილებისთვის გააგრძელებს. ჩვენი მეტოქე დღეს, გვიან გამოვლინდება — საკვალიფიკაციო მატჩში საქართველოს ნაკრები A ჯგუფის მესამეადგილოსანს დაუპირისპირდება. ეს ადგილი ჯერჯერობით ვაკანტურია და მას აზერბაიჯანი-ჩრდილოეთ მაკედონიის შეხვედრაში გამარჯვებული გუნდი დაიკავებს.

ესტონეთთან შეხვედრა საკმაოდ დაძაბული გამოდგა. საწყისი მეოთხედი მეტოქის უპირატესობით წარიმართა და ესტონელებმა 25:22 მოიგეს. თუმცა, მეორე პერიოდში ქართველმა კალათბურთელებმა თამაში გამოასწორეს, მეოთხედი 28:24 მოიგეს და დიდ შესვენებაზე მინიმალური უპირატესობით, 50:49 გავიდნენ. მესამე ათწუთეულში ჩვენმა ნაკრებმა დაცვაში თამაში გაამკაცრა, მეტოქეს მხოლოდ 15 ქულა ჩააგდებინა (19:15) და ბოლო პერიოდის წინ 5-ქულიანი ლიდერობა მოიპოვა. გადამწყვეტ მეოთხედში ქართველებმა უპირატესობა კიდევ უფრო განავრცეს (23:17) და საბოლოოდ დამაჯერებელი გამარჯვება გააფორმეს — 92:81.

ჩვენი გუნდიდან საუკეთესო იყო ამირან აროშიძე, რომელმაც ორმაგი დუბლი გაიფორმა — 25 ქულა, 10 მოხსნა და 31-იანი მარგი ქმედების კოეფიციენტი დააგროვა. შესანიშნავი მატჩი ჩაატარა გოგიტა ბუკიამ, რომელმაც 17 ქულა (7-დან 6 ორქულიანი) და 4 მოხსნა მიითვალა. 14 ქულითა და 6 შედეგიანი გადაცემით გამოირჩა ლუკა კოტლიარევსკი, ხოლო გიორგი ჭირაქაძემ გუნდს 8 ქულა და 8 მოხსნა შესძინა. ესტონელთა რიგებში კი ყველაზე შედეგიანები მარტენ ალესი (20 ქულა) და პატრიკ მაე (16 ქულა) იყვნენ.