ხვალ სუპერლიგის ფინალური სერია იწყება. საქართველოს რიგით 33-ე ეროვნული ჩემპიონატის ტიტულისთვის ერთმანეთს თბილისის სახელმწიფო უნივერსიტეტის გუნდი და “ბათუმი 2010” შეხვდებიან. სტუდენტებისთვის ეს მეხუთე ფინალია: 2010 და 2011 წელს მათ ვერცხლის მედლები მოიპოვეს, 2023 წელს ჩემპიონობა იზეიმეს, ხოლო 2025 წელს დრამატულ ბრძოლაში დათმეს ტიტული. მიმდინარე ფორმაციის ბათუმური კლუბისთვის კი ეს პირველი, ისტორიული ფინალია. მიუხედავად იმისა, რომ ზღვისპირელებს საუკუნეების მიჯნაზე ლეგენდარული „ბასკოს“ სახით ოთხგზის ჩემპიონი წინაპარი ჰყავდათ, ეს სრულიად სხვა გუნდია.
დღეს, ოლიმპიურ სასახლეში მეტოქე გუნდების მთავარი მწვრთნელები და თითო წამყვანი მოთამაშე შეიკრიბა. თსუ-ს მხრიდან ლექსო ლაფანაშვილმა და ალექსანდრე ფევაძემ, ხოლო ბათუმელთაგან ბუბა ბერიშვილმა და გიორგი ოჩხიკიძემ გააკეთეს განცხადებები. ორივე მხარე თავშეკავებულია და ბრძოლისთვის მზადაა.
შეგახსენებთ, რომ სერია 3 მოგებამდეა და მატჩები 21, 23 და 26 მაისს გაიმართება. თუკი საჭირო გახდა, დამატებითი შეხვედრები 28 და 31 მაისს ჩატარდება. მოედნის უპირატესობა თსუ-ს აქვს და თბილისში 21, 23 და საჭიროების შემთხვევაში 31 მაისის თამაშებს უმასპინძლებს.
