ისტორიული მოგება ჩემპიონთა ლიგაზე | ბათუმის გამარჯვება და ოჩხიკიძის გმირობა

სუპერლიგის გასული სეზონის ჩემპიონი „ბათუმი“ გახდა პირველი ქართული გუნდი, რომელმაც ფიბას ჩემპიონთა ლიგის ტურნირზე გამარჯვება მოიპოვა. ბათუმელებმა დღეს, ჩემპიონთა ლიგის საკვალიფიკაციო ტურნირის პირველ მატჩში, შვეიცარიის მოქმედი ჩემპიონი „ფრაიბურგი“ დრამატულ ბრძოლაში — 86:85 დაამარცხეს და ფიბას მიერ ორგანიზებულ უმაღლესი რანგის ტურნირში პირველი გამარჯვება მოიპოვეს.

ბათუმელებმა თამაში ორჯერ მოიგეს. ერთხელ, როცა თამაშის დასრულებამდე ორ წუთზე ნაკლები იყო დარჩენილი და ქართული გუნდი 10 ქულით იგებდა. თუმცა უხეში შეცდომების დაშვების შემდეგ, შვეიცარიულ გუნდს მოგების შანსი მიეცა. საქართველოს ჩემპიონმა ბოლო წუთზე ორჯერ დაკარგა ბურთი და ბოლო შეტევაში შვეიცარიელებს, რომ ჩაეგდოთ, მოიგებდნენ კიდეც, მაგრამ ფარქვეშ შეჭრილ მათ უკანახაზელს ბურთი ხელიდან გაუვარდა, რომელიც ბათუმელებს დარჩათ და დროც ამოიწურა.

მატჩის გმირი გახდა საქართველოს ეროვნული ნაკრების გამთამაშებელი გიორგი ოჩხიკიძე, რომელმაც თითქმის უიმედო მდგომარეობაში მყოფ ბათუმელებს გამარჯვების მომტანი სამქულიანი მიუთვალა. ეს მოხდა მატჩის დასრულებამდე 16 წამით ადრე, როცა თანაბარ ანგარიშზე გიორგი ოჩხიკიძემ თამაში საკუთარ თავზე აიღო. ბურთს ათამაშებდა, მაგრამ თავისიანები ვერ გაეხსნენ და შეტევისთვის განკუთვნილი დროის ბოლო წამზე სამქულიანი ჩააგდო — 86:83. ამის შემდეგ წავიდა ტაქტიკური თამაში. ოჩხიკიძის მიერ აღებული ჯარიმა შვეიცარიელებმა ორ ქულად გარდასახეს და „ბათუმს“ ბოლო შეტევა დარჩა, რომელშიც უპატიებელი შეცდომა დაუშვა. გვერდიდან შემოტანის დროს ბურთი დაკარგა და 1 ქულით ჩამორჩენილ „ფრაიბურგს“ დარჩენილ ცხრა წამში გამარჯვების შანსი მიეცა.

სწორედ აქ გათამაშდა ის დრამატული მომენტი, როცა შვეიცარიულმა კლუბმა ბურთი გაათამაშა, ფარქვეშ შეიჭრა ჯო ტუსანი და როცა „ფრაიბურგის“ ყველა ქომაგი მისგან გამარჯვების ბურთის ჩაგდებას ელოდა, სამწამიანში მას ბურთი ხელიდან გაუვარდა, რომელიც საბა სალაძემ მოიხელთა და…

რაც შეეხება ზოგადად მატჩს, „ბათუმი“ გამარჯვებას ალალად იმსახურებდა, რადგან პირველივე წუთებიდან თამაშზე კონტროლი დაამყარა და ლიდერობას მთელი თამაში ინარჩუნებდა. შვეიცარიელები საწყის წუთებზე ლიდერობდნენ სამი-ხუთი ქულით და ეს მათი მაქსიმუმი იყო. დანარჩენ შემთხვევაში „ბათუმი“ მეტოქეზე მაღლა იდგა როგორც დაცვაში, ასევე კომბინაციურ, პოზიციურ თამაშში.

გმირობასთან ერთად, გიორგი ოჩხიკიძე ბათუმელთა ყველაზე სასარგებლო მოთამაშეც გახდა — 34:26 წუთში მან 17 ქულა, 10 პასი (ორმაგი დუბლი) და 2 მოხსნა მოაგროვა (მარგი ქმედების კოეფიციენტი 20). 18 ქულით ბათუმელთა ბომბარდირი ამერიკელი ლეგიონერი ვალდი ზეფირი გახდა (7 მოხსნა). ორმაგი დუბლი შეასრულა ცენტრმა კარსონ ბაშამმა — 16 ქულა და 12 მოხსნა. 16 ქულა მიითვალა ლარი ჰაუელმაც (8 მოხსნა), ხოლო ვალერიან ცულეისკირმა გუნდს 11 ქულა და 4 მოხსნა მოუტანა. დავით ლომიძემ 5 ქულა და 3 პასი დააგროვა, ხოლო ლევან ბაბილოძემ — 3 ქულა.

ეს გახლავთ ისტორიული გამარჯვება ჩემპიონთა ლიგაზე. აქამდე ამ ტურნირის საკვალიფიკაციოში სამ ქართულ გუნდს უთამაშია, მაგრამ ვერც „დინამომ“, ვერც „თსუ“-მ და ვერც „ქუთაისმა“ გამარჯვების მოპოვება ვერ შეძლეს. ჩემპიონთა ლიგის ჯგუფში რომ მოხვდნენ, ბათუმელებმა კიდევ ორი მატჩი უნდა მოიგონ. ბუბა ბერიშვილის გაწვრთნილ გუნდს 18 სექტემბერს რუმინულ „ორადიასა“ და კვიპროსულ „აეკ ლარნაკას“ შორის გამარჯვებულის წინააღმდეგ აქვს მატჩი. გუნდებს შორის გამარჯვებული დღეს გვიან ღამით გამოვლინდება.