22-წლამდელთა ჩემპიონატში ნახევარფინალი დაიწყო: სერიებში რუსთავი და ვსა დაწინაურდნენ
საქართველოს 22-წლამდელთა ჩემპიონატში ფინალისტების გამოსავლენად ბრძოლა გადამწყვეტ ფაზაში შევიდა. დღეს გამართულ ნახევარფინალური სერიის პირველ შეხვედრებში ფავორიტებმა სტატუსი გაამართლეს, თუმცა გამარჯვებისკენ მიმავალი გზა ორივე გუნდისთვის განსხვავებული აღმოჩნდა. „რუსთავმა“ და ვიქტორ სანიკიძის აკადემიამ (ვსა) სერიაში ანგარიში 1:0 გახადეს და ფინალამდე მხოლოდ ერთი მოგება აშორებთ.
რეგულარული ჩემპიონატის ტრიუმფატორმა „რუსთავმა“, რომელმაც სეზონი მხოლოდ ერთი მარცხით დაასრულა და მეოთხედფინალში გურჯაანის „დელტა“ დამაჯერებლად (2:0) ჩამოიშორა, ნახევარფინალის პირველ მატჩში საკმაოდ მედგარი წინააღმდეგობა დაძლია. მათი მეტოქე „ჰიუნდაი“ სერიას რთული ბრძოლების შემდეგ შეხვდა — თელავთან დაძაბული 2:1 მოგების შემდეგ, მათ რუსთავშიც სცადეს სიურპრიზის შემოთავაზება. მატჩის სტარტზე სტუმრები ლიდერობდნენ კიდეც, რასაც გარდამავალი უპირატესობით მიმდინარე თამაში მოჰყვა, თუმცა ბოლო პერიოდში მასპინძლებმა იძალეს და საბოლოოდ 78:65 (სტატისტიკა) გაიმარჯვეს. ამ გამარჯვებაში უდიდესი როლი ითამაშა რუსთაველთა გამთამაშებელმა ლუკა ტაბაღუამ, რომელმაც 15 ქულასთან ერთად ბრწყინვალედ მართა თამაში და პარტნიორებსაც არაერთი შედეგიანი პასი მიაწოდა. მასპინძელთა რიგებში 17 ქულით საუკეთესო იყო ლუკა მუჯირიშვილი, ნიკოლოზ ჩქოთუამ (9 ქულა) კრიტიკულ მომენტებში მნიშვნელოვანი სამქულიანები ჩააგდო, ხოლო დათა ვაშაკიძის მიერ მოპოვებული 12 ქულა გარდამტეხი აღმოჩნდა მატჩის ბედისთვის. „ჰიუნდაის“ მხრიდან გამორჩეული იყო ნიკოლოზ კუპატაძე 16 ქულითა და 8 მოხსნით.
მეორე ნახევარფინალურ წყვილში ვსა-მ „ვინგსს“ დამაჯერებლად სძლია — 90:79 (სტატისტიკა). აკადემიელებმა, რომლებმაც რეგულარული 17 მოგებითა და მხოლოდ 1 მარცხით დაასრულეს, თავიდანვე აიღეს ინიციატივა და მეტოქეს წინ გასვლის შანსი არ მისცეს. მატჩის დინამიკა პირველივე პერიოდიდან (29:16) გამოიკვეთა. მართალია, მესამე პერიოდში „ვინგსმა“ სხვაობის შემცირება სცადა (14:27), მაგრამ ვსა-მ მალევე დაიბრუნა კონტროლი. გამარჯვებულთა რიგებში სტატისტიკურად საუკეთესო დავით გოგოლაძე იყო 15 ქულითა და 6 პასით, მას მხარი აუბეს გიორგი ნიკოლაევმა (15 ქულა), ვატო გაჩეჩილაძემ (15 ქულა) და დავით ჭუაძემ (13 ქულა), ხოლო გიორგი დოხნაძემ ფარქვეშ 12 მოხსნით იდომინირა. „ვინგსის“ რიგებში ყველაზე შედეგიანი ირაკლი ახალაია (22 ქულა) და თემურ კაპანაძე (22 ქულა, 7 მოხსნა) იყვნენ.
ნახევარფინალური სერიები 5 მაისს თბილისი არენაზე გადაინაცვლებს. 18:00 საათზე „ჰიუნდაი“ შეეცდება სერიის გახანგრძლივებას „რუსთავთან“, ხოლო 20:00 საათზე „ვინგსი“ შეეცდება ვსა-ს წინააღმდეგ ვითარების გამოსწორებას. შეძლებს თუ არა რომელიმე გუნდი სერიის გათანაბრებას, თუ 5 მაისს უკვე გვეცოდინება ფინალისტების ვინაობა, ამას სულ მალე შევიტყპობთ.