სანდრო მამუკელაშვილმა „ლოს ანჯელეს ლეიკერსის“ რიგებში თავისი საუკეთესო შეხვედრა ჩაატარა — ქართველმა ფორვარდმა NBA-ს წინასასეზონო ბატალიაში კალიფორნიულ გუნდს 19 ქულა წაახმარა, რაც ახალ კლუბში მისი სადებიუტო პირადი რეკორდია.
თავის მხრივ, „ლეიკერსმა“ საკუთარ არენაზე „საკრამენტო კინგსს“ უმასპინძლა და დაძაბულ ბრძოლაში, 114:110 დაამარცხა მეტოქე.
ჩვენებურმა პარკეტზე დათმობილ 21 წუთში ფენომენალური ეფექტურობა გამოავლინა: 19 ქულასთან ერთად მან 4 შედეგიანი გადაცემა, 3 მოხსნა, 1 ჩაჭრა და 1 დაფარება მიითვალა. სანდროს ტყორცნები თითქმის უშეცდომო გახლდათ — 4-დან 4 ორქულიანი და 2-დან 2 საჯარიმო გამოიყენა, ხოლოს პერიმეტრიდან 6-დან 3 სამქულიანი ჩააგდო.
შეხვედრის საუკეთესო მექულე მაინც მისი თანაგუნდელი ლუკა დონჩიჩი გახდა, რომელმაც მოედანზე გატარებულ 25 წუთში 23 ქულა მოაგროვა.
„ლეიკერსი“ მორიგ საგამოფენო შეხვედრას 14 ოქტომბერს გამართავს, სადაც „გოლდენ სტეიტ უორიორსს“ დაუპირისპირდება.
