6 ნოემბერს ევროლიგის ეგიდით ბოლონიაში გასამართი დაპირისპირება სავსებით განსაკუთრებული და პრინციპული იქნება „დუბაის“ ერთ-ერთი ლიდერისთვის, თორნიკე შენგელიასთვის, რადგან არაბული კლუბი მის ყოფილ გუნდს, ადგილობრივ „ვირტუსს“ ესტუმრება.
იტალიური კლუბის ხელმძღვანელობამ ოფიციალურად დაადასტურა, რომ მატჩის წინ ქართველი კალათბურთელის უზარმაზარი დამსახურება სათანადოდ დაფასდება — „ვირტუსი“ საქართველოს ეროვნული ნაკრების კაპიტანს კლუბის ისტორიულ დიდების დარბაზში (The Virtus 100 Hall of Fame) ოფიციალურად შეიყვანს.
შეგახსენებთ, რომ შენგელია ბოლონიაში 2022-2025 წლებში თამაშობდა და ამ პერიოდში გუნდის ერთ-ერთ მთავარ მამოძრავებელ ძალას წარმოადგენდა. მისი ლიდერობით „ვირტუსმა“ 2024-2025ლების სეზონში იტალიის სერია A-ს ტიული მოიპოვა, 2022 და 2023 წლებში ქვეყნის სუპერთასი/თასი მოიგო, ხოლო 2022 წელს ბოლონიელებთან ერთად ევროთასის (EuroCup) ტრიუმფატორიც გახდა.
ბოლონიური კლუბი თოკოს განსაკუთრებულ დახვედრასა და საზეიმო ცერემონიას უწყობს. შეხვედრა თბილისის დროით 23:30 საათზე დაიწყება.
ცნობისთვის, მიმდინარე ევროლიგის სეზონში შენგელიას „დუბაის“ აქტივში 6 მოგება და 3 მარცხია, რითაც გუნდი სატურნირო ცხრილის სათავეში მყოფ ლიდერებს — „პანათინაიკოსსა“ და „ოლიმპიაკოსს“ მხოლოდ ერთი გამარჯვებით ჩამორჩება.
