თბილისი 16 წლამდე გოგონათა შორის ევროჩელენჯერს მასპინძლობს

დღეს თბილისში სტარტს აიღებს 16 წლამდე გოგონათა ევროჩელენჯი, რომელშიც საქართველოს ნაკრებთან ერთად მალტის, სომხეთის, ალბანეთისა და ჩრდილოეთ მაკედონიის ნაკრებები მიიღებენ მონაწილეობას. მოგეხსენებათ, 2 კვირის წინ დასრულდა 20 წლამდე ვაჟთა ევროჩელენჯი, რომელსაც საქართველოს კალათბურთის ეროვნულმა ფედერაციამ მაღალ დონეზე და უსაფრთხოდ უმასპინძლა.

16 წლამდე გოგონათა ევროჩელენჯი 9 აგვისტოს რომ დაიწყება, 14-მდე გასტანს. ყოველ დღე თბილისის სპორტის სასახლეში 2-2 მატჩი ჩატარდება, ხოლო 12 აგვისტოს ტურნირზე დასვენების დღეა.

2 დღეა, ევროჩელენჯის მონაწილე ნაკრებები თბილისში ჩამოვიდნენ და სასტუმრო “ქორთიარდ მარიოტში” დაბინავდნენ. გუნდები სპორტის სასახლეში ვარჯიშობენ და მოახლოებული ტურნირისთვის ემზადებიან. ტურნირზე გამარჯვებული ერთი წრის ჯამში გამოვლინდება. 

გაუარესებული კოვიდ-ვითარების გამო სპორტის სასახლეში თამაშები მაყურებლის გარეშე ჩატარდება. ყველა მატჩის ლაივ-ტრანსლირება მოხდება საქართველოს კალათბურთის ეროვნული ფედერაციის YouTube და Facebook გვერდებზე.