საქართველოს 16-წლამდელთა ნაკრებმა ჩეხეთი დაამარცხა და დიდ ბრიტანეთს შეხვდება

საქართველოს 16-წლამდელთა ნაკრებმა ევროპის ჩემპიონატის B დივიზიონში საკვალიფიკაციო რაუნდის მორიგი თამაში მოიგო. ირაკლი ჩერქეზიშვილისა და დიმიტრი ჯაკობოვის გაწვრთნილი გუნდი ჩეხეთს დაუპირისპირდა და 65:87 (სტატისტიკა) გაიმარჯვა.

ჩეხეთთან მატჩში გამორჩეული იყო ნიკოლოზ აბულაძე, რომელმაც 30 ქულა, 9 მოხსნა, 9 შედეგიანი გადაცემა, 4 ჩაჭრა მიითვალა და ამით თამაშის ყველაზე შედეგიანი მოთამაშე გახდა. 17-17 ქულაა ავთანდილ ბახტაძისა და გურამ ცხადაძის ანგარიშზე, ხოლო 11 ქულა გამოიმუშავა ალექსანდრე დაუშვილმა.

შეგახსენებთ, რომ ბულგარეთის დედაქალაქ სოფიაში მიმდინარეობს 16-წლამდელთა ჩემპიონატის B დივიზიონი, რომელშიც 22 გუნდი მონაწილეობს და მათგან 3 საუკეთესო A დივიზიონის საგზურს მოიპოვებს. საქართველოს 16 წლამდელთა გუნდი ასპარეზობას 9-22 ადგილებისთვის განაგრძობს და შემდგომ საკვალიფიკაციო მატჩს დიდ ბრიტანეთთან გამართავს.