3×3 კალათბურთში WinterCup2021-ის სერიის პირველი გამარჯვებული Old school გახდა

3×3 კალათბურთში ზამთრის სერიები დაიწყო. საქართველოს კალათბურთის ეროვნული ფედერაციის ორგანიზებით სეზონის უმთავრესი 3×3 საკალათბურთო ღონისძიების – Geotour-ის გარდა პერიოდულად იმართება სხვადასხვა სახის ტურნირები. ზამთრის სერიები სახელწოდებით WinterCup2021 დღეს თბილისის ოლიმპიურ სასახლეში გაიხსნა.

ტურნირში, რომელშიც 18 წელს გადაცილებული კალათბურთელები მონაწილეობდნენ, 11-მა გუნდმა იასპარეზა. ჯგუფური ეტაპის შემდეგ გამოვლინდნენ ნახევარფინალისტები: მუხბე – GREEN ROOM, EASY – OLD SCHOOL. ორივე ნახევარფინალი საკმაოდ საინტერესო გამოდგა. GREEN ROOM-მა (რეზი მაღლაფერიძე, ვაკა ბიჭაშვილი, კახა გიორგაძე, ბექა ქარცივაძე) მეტოქეს 14:11 აჯობა, ხოლო OLD SCHOOL-მა (დავით ბარბაქაძე, რიჩარდ მათიაშვილი, ბიქტორ კოღუაშვილი, საბა სირაძე) შედარებით იოლად – 21:16 იმარჯვა.

ფინალურ მატჩში დიდი ბრძოლა გაიმართა. ანგარიშით 21:18 საბოლოოდ OLD SCHOOL-მა იმარჯვა და ტურნირის გამარჯვებული გახდა. საპრიზო ფონდიდან პირველ ადგილზე გასულ გუნდს 500, ხოლო მეორეს – 300 ლარი გადაეცა. პრიზიორები კალათბურთის ეროვნული ფედერაციის 3×3 კალათბურთის დეპარტამენტის ხელმძღვანელმა, გიგა გურგენიძემ დააჯილდოვა. 

WinterCup2021-ის მორიგი ტურნირი 16 დეკემბერს, ოლიმპიურ სასახლეში, 18-წლამდელთა შორის გაიმართება.